Tella-d tfaska n usaru amaziɣ n Sinima n Lmerruk ddurt iɛeddan iwumi semman “Tafsut” . Teḍra-d deg taddart n Tafrut , tedda seg wass n 25 armi d ass n 28 deg yebrir yezrin. D asiher anda i rran yiɛeggalen-is tajmilt i umsuffeɣ aqbayli n sinima Mass Yunes Budawed , imi i yettekki s usaru ‘Asaruf’ anda i d-yewwi araz mbaɛd imi i d-yettwasenɛet tameddit n wass n 25 yebrir sdat n waṭas n yimferǧen . Aya, yessefreḥ nezzeh Mass Budawed. Ɣef waya dɣa, yenna-d i Uɣmis n yimaziɣen : “ Tafaska-agi d ayen yelhan , acku d yiwet n tegnit anda ara tissineḍ wid ixeddmen deg taɣult-agi. Akken daɣen d tagnit anda i d-nnejmaɛen Yimaziɣen, anda i d-walaɣ kra n tudrin n tmurt-agi. Ferḥeɣ aṭas imi i yi-xedmen leqdar, ɛerḍen-iyi-d, rran-iyi azal. Rnu ɣer waya, iɛedda-d usaru n ‘ASARUF’.
Akken daɣen i d-temmeslay tɣamsa tamarukit ɣef wayen i xeddmeɣ, d ayen ara iyi kemmlen afud akken ad rnuɣ deg uxeddim. Mi ara ak-tuɣal tejmilt di tmurt taberranit, d ayen ara d-yessbegnen belli axeddim-ik, ttwalint wiyaḍ”. Ma ɣef ssebba i yeǧǧan isura-s ur kkin ara deg tfaskiwin i d-yettilin deg Tizi Uzzu, yessefhem-d : “Di Tizi Uzzu, zgan kkren-iyi-d mgal , axaṭer isura n Budawed, lhan akken iwata. Ɣer ugdud, nutni ur ḥemmlen ara win ara irebḥen mebla yis- ssen. Ihi, kkaten akken ad i yi-neṭṭlen , akken ad d-banen kan nutni, acku tetten seg yiwet n tḍebsit”. Ad d-nesmekti kan belli asaru-agi yettwaheggi-d, ad iɛeddi deg tfaska-nniḍen di temdint n Sus n Merruk di teẓrigt-is tamezwarut .D ayen yessefraḥen, d ayen ara yessuzren ama d tameslay , ama d idles d leɛwayed-nneɣ ɣer wiyaḍ .
Souhila Yamani