Sɛan yilemẓiyen amur ameqqṛan deg usegmu n tmetti, imi ččuṛen d tazmert, ama d tin n wallaɣ, neɣ d tin n tfekka. Daymi i d-yewwi ɣef yimḍebbṛen n yal taɣiwant, ad asen-rren azal i terbeεt-a i wakken ad d-sbeggnen afud yellan deg-sen i ubaɣuṛ n tmetti s umata.
Taɣiwant n At Smaεel akked yimezdaɣ-is, deg tecwawt-nsen aselway-is Mass Sadeq Rebbaεi, bedden akken ilaq ɣef temsalt-a, ayagi imi i d-sbedden Aseqqamu Aɣiwan n Yilemẓiyen i iqeddcen ama deg uḥric n yidles, tawennaḍt, neɣ d ayen icudden ɣer umussu asdukklan. Aredmani, ur llin d wid yegnen iseggasen yezrin ɣef leqdic d unadi ɣef tmussni, lameεna segmi i d-yennulfa ugraw-a n yilemẓiyen, rnan deg lǧehd-nsen. Dɣa i wakken ad neǧṛen abrid-nsen, ad sεun tarmit deg unnar n leqdic asdukklan, aselway n tɣiwant n At Smaεel, s ufus n tallelt n tdukkla « Agora », akked tesbeddit « Konrad Adenauer », heggan-d yiwen n wass n usileɣ i yiqeddacen n tddukkliwin n At Smaεel d warrac-nsen s umata, ɣef umussu asdukklan.
Timlilit-a i d-yellan deg Uxxam n tɣiwant n At Smaεel, tεedda akken iwulem, imi d tin i d-yernan i warrac tamussni, d lebɣi ugar, i wakken ad d-lḥun deg leqdicat-nsen ɣer sdat, Ayagi s tnaga n wid iḥeḍren dinna. Ma yella d aselway n tɣiwant seg tama-s, yenna-aɣ-d : «Tiddukkliwin d tiqenṭert gar tmetti d yimezdaɣ-is, imi ayen ɣef wacu qeddcent tddukkliwin, iseεεu azal deg tmetti, ɣef waya i nεemmed ad asent-nernu tamussni i tinna i sεant yakan i usnerni n tektiwin, d usnulfu s umata. Bɣiɣ ad d-snemmreɣ ilemẓiyen-nneɣ, d wid akk i d-yerzan, ama d tiddukkla « Agora », tasbeddit « Konrad Adenauer », neɣ taṛmist n uqeddic deg teywalt « Comet Info », d wiyaḍ, yal yiwen s yisem-is».
K. K.