Tetthegi-d tesdawit Mulud Mɛemmeri, i wussan n 11, 12 d 13 meɣres i d-iteddun, yiwet n temlilit tagraɣlant s usentel « Ccna n teqbaylit akked tmaziɣt : Anadi d useḥbiber ɣef tmagit ». D asihar ara d-ijemɛen aṭas n yimussnawen akked yisdawanen, wid n tmurt neɣ n berra, i yettnadin deg uḥric-agi n ccna amaziɣ s umata. Ad d-awin awal ɣef 8 n tenqiḍin i yesɛan assaɣ gar ccna akked tmagit.
Imi ccna d allal n tenfalit i yettwaseqdacen s waṭas deg tmettiyin i yeddan s timawit, daymi i d-llan yinadiyen deg uḥric-agi n ccan. Bɣan yimnadiyen ad d-ssifriren assaɣ yellan gar ccna akked tmagit, ladɣa ccna aqbali neɣ amaziɣ s umata akked tmagit. Ad walin ccna amḥaddi d uzbu s wudem ussnan: Acu i d-yettilin deg-s? D wamek i ibennu? D taswist, diɣ, i usteqsi ɣef yiɣbula n yiḍrisen n ccna amḥaddi d uzbu deg uḥric-agi n tmagit. Yal acennay s tarrayt-is akked tmuɣli-s. Aya, ad d-yeglu, ahat, s tmuɣliwin-nniḍen d wallalen i useḥbiber ɣef tmagit akked tutlayin s umata.
Deg tazwara, ad sqerdcen yimnadiyen-agi aseggiw n tmedyazt: Aḍris yettwacnan akked temsalt n tmagit tamaziɣt; ccna akked tmagit d tawsit n tmedyazt…atg. Syin, ad d-mmeslayen ɣef umezruy n ccna: Tizlit akked umezruy; ansay imawi akked temsalt n tmagit; lebni n tmagit deg ccna amaziɣ…atg. Am waken, diɣ, ad d-ilin yisaragen ɣef useggiw asertan d uzbu, asugen deg tezlatin, iḥricen n tesnilest deg tmaziɣt yettwacnan d waṭas-nniḍen n yisental.
I lmend n waya, ihi, ssawlen yimsuddsen n temlilit-a i waṭas n yimnadiyen, yecban Pr Anna-Maria Ditolla n tesdawit Naples deg Ṭelyan, Pr Daniela Merolla n Inalco deg Fransa, Pr Moha Ennaji n Inlac deg Merruk, Pr Mustapha Trabelsi n tesdawit n Sfax deg Tunes akked yisdawanen n tmurt n Lezzayer. Wid n Lezzayer tamanaɣt, n Mestɣanen, Bgayet akked Tizi Uzzu.
Hocine Moula