Accueil Tamazight * * Afellaḥ d mmi-s.

Tamacahut Tis (07)

* * Afellaḥ d mmi-s.

56655

Illa yiwen n urgaz d afellaḥ, ala tamusni i d raṣ lmal-is, maca nnif d lḥerma d agerruj, γef isseḥbibir nezzeh. Ihi yiwen n wass, innuγ d tmeṭṭut-is armi i t-tluqeb, tenna-yas:-Lukan sεiγ zzher nekk seg uxxam n wid iγṛan, ur ttaγeγ ara afellaḥ leεmeṛ ikcim aγerbaz, atmaten-iw d at leqlam γef umeẓẓuγ.

Afellaḥ, mi isla i lehduṛ-agi, ittwajreḥ, acku iẓra sani rran. inna-yas:-Ihi i mi ttwaḥqṛeγ akk, ad truḥed tura γer uxxam-nwen, ad ten-testeqsiḍ γef wayen akk ad awen-ini&gamma,; ma ur d-tewwiḍ ara tiririt iseḥḥan ad tuγaleḍ, acku win iγran mačči d nekkini.

Tenna-yas:-Bbuh ! Ur yelli usteqsi umi ur sεin watmaten-iw tiririt.

Inna-yas:-Ini-asen acu i irẓagen di ddunit ? D acu i iẓiḍen di ddunit?

Tenna-yas:-Ah d aya ! tura ara ruḥeγ.

Mmi-tsen ad d-issel i wayen ara iḍeṛṛun, iḥsa yemma-s ur d-tettawi tiririt ilaqen, issen baba-s d bu lemεun, xwal-is d at-zzux n baṭel, yuggad γef yemma-s, iffeγ si ṭṭaq n teεrict, izwar s abrid ad iqabel yemma-s, imlal yid-s mi tleḥḥu inna-yas:-Yemma tewwiḍ-d tiririt?

Tenna-yas:-Meεlum.

Inna-yas:-Acu-tt?

Tenna-yas:-I iẓiḍen d tament, i irẓagen d qeḍṛan.

Dγa yewwet anyir-is, inna-yas:-Acu iyi-yeğğan zwareγ-am-d s abrid.

Tenna-yas:-Ayγer?

Inna-yas:-Lemmer ad isel i tiririt-a ad am-ibḍu aqeṛṛu, ma tebγiḍ ad tkemmleḍ ussan-im yid-ne&gamma,; ini’-as terẓeg d cceṛ tiẓedt d lxiṛ.

Yuγal mi tewweḍ s axxam, inna-yas urgaz-is:-Amek ihi?

Tenna-yas:-Ad ak-qaṛṛen i irẓagen d cceṛ, i iẓiden d lxiṛ.

Argaz mi yesla i tririt yuzzel srid ar tγurfet, yufa-n mmi-s ulac-it, ifhem tamsalt, iruḥ-d s azniq yaf mmi-s di beṛṛa, inna-yas:-Imi tselkeḍ wiyaḍ, sellek tura iman-ik.

Baba-s:-Acu i iγelben times?

Mmi-s: – D aman.

Baba-s:-Acu i iγelben aman?

Mmi-s:-D asawen.

Baba-s:-D acu i iγelben asawen?

Mmi-s:-D lxil.

Baba-s:-D acu i iγelben lxil?

Mmi-s:-D argaz.

Baba-s:-D acu i iγelben argaz?

Mmi-s:-D tameṭṭut.

Inna-yas baba-s:-Ihi a mmi, tura mi k-ẓriγ d uḥdiq ad k-weṣṣiγ.

Mmi-s:-Anεam a baba !

Baba-s:-Ur xeddem d leḥkem ijuṛen, ur ttawi ṭlaba umectaq, ur mmal lbaḍna i tmeṭṭut.

Mmi-s:-Ad ak-yeεfu Ṛebbi.

Yeḥya Yanes. (Yahia Yanes)