Aṭas n yikabaren i yesseqdacen tamaziγt mi d-yeḥder layan n tefranin, meεna akken kan ara ṭṭfen imekwan nsen di tγiwant neγ deg usqamu aγerfan tettun lεehd ay fkan. Uγalen ula d lheddra ur tt-heddren ara deg umahil nsen neγ εad di temliliyin nsen.
Cwi kan llan wid yumnen d akken tamaziγt d bab-is i izemren ad tt-yerr d tunṣibt : yessefk ad tt-yesseqdac di yal aḥric n tmetti mebla ma yerğa kra n yiṣadaf imi ha-tt-an d tameslayt taγelnawt. Ihi, dγa, daya i yexdem yiwen n yimḍebber deg tefranin-agi iεeddan (di tugna-agi yura : irgazen, tilawin). Deg uγerbaz anida ḍrant tefranin-agi, uran akk iwilihen s tlata n tutlayin (tamaziγt, tafrensist akked taεrabt). Kra n win yewwḍen γer din yeγra-d tamaziγt-nni mebla ma yeḥtam. Amur ameqqran deg-sen ferḥen nezzeh s cγel-agi u nnan-as :’’ lemmer i tt-nettaf di yal amekkan tili akka ara tuγal d tunṣibt di tmetti.’’
Ma d yiwen uselmad n tmaziγt yenna-aγ-d :’’nekni ula deg wass n tezrawt, ur nettmeslay ara tamaziγt. Dγa, ddurt-agi iεeddan, d imaswaḍen n teεrabt i aγ-d-yemmeslayen γef yizerfan d iṣudaf n yixeddamen s… taεrabt. Aya nezmer ad t-neqbel imi ur ssinen ara,ahat, tamaziγt, meεna ula d amaswaḍ nneγ iḍewwer-itt s taεrabt. Cwi kan llan sin-nni-nniḍen n yimaswaḍen, rran-d tiqit : mmeslayen-aγ-d, nutni, s tmaziγt yerna γef wayen iceγben s tidet iselmaden.’’
Akken yebγu tili teswaεt, tamaziγt tettaẓ γer sdat. Imdanen s umata ttnadin ad tt-issinen imi d tamsalt i ten-icuγben imi i tt-qqaren warraw nsen.
Hocine.M