I tikkelt-niḍen, lεesker n Lezzayer ibeggen-d i wid ur nebγi ad amnen dakken ur ikennu ara sdat n rrebrab, ur yettjar ara yid-s s terwiḥin n yimdanen. Xas akken llant tmura i as-yennan ur ilaq ara ad yedhem γer wanda ṭtfen yirebraben imdanen, meεna tamsalt teεna deg tazwara tamurt n Lezzayer. D nettat i yeẓran u yessnen akken ilaq iswiyen n Wat yiččumar. Ẓran dakken irebraben-a qessden ad xedmen tawaγit deg tama n Tigenturin. Γef wakken i d-yeffeγ lexbar, imdanen-a gemmnen ad sserγen imekwan n lgaz mebεed mi ara nγen wid-nni akk i ṭṭfen. Ihi, cwi kan tamurt n Lezzayer ur tcawer ara leğnas-nniḍen, tili ha-t-an beddlen-as rray. Marikan, dγa, ur tebγi ara imi i d-yeḍra wanect-a mebla ma tcawer-itt Lezzayer, ladγa imi d-tegla twaγit-a s lmut n yimdanen. Am wakken nettat (Marikan), texdem akk lgerrat-is zeddigit : acḥal yeddan di leγlaḍ deg Lεiraq, deg Libya, deg Sumali…atg. Anda llant tmura-a, Japon, Legliz, Marikan d tiyaḍ asmi akken Yizzayriyen ttqabalen weḥd-nsen At iččumar ? Asmi ttmettaten sdat wallen n ddunit merra ? Meεna ass-nni, gan-asen irebbi, sebrarḥen tiwwura i yimḍebbren n trebbuyaε n yiqettalen. Ihi ass-a, Σin Amennas mačči d Bamako neγ d Konna. Lezzayer mačči d Mali. Lezzayer tezmer i yiman-is mi d-teḥder tegnit n ddiq. Akken yebγu yili-d ustehzi s-γur Lezzayer di temsalt-agi n Sahel, akken tebγu tili tmuγli-s akked temsalt n Azawad, tikelt-a Lezzayer tbeggen-d tirrugza-s deg ubrid n ṣswab. Akka i d leεqel d lmeεqul, akka i nebγa Lezzayer ad tili…
Hocine. M