Ass n 16 deg waggur-agi, tamazdayt n yimezdaɣ n Rafur tuzen kra n yinefrayen ɣer usqamu aɣerfan n twilayt n tubiret akked uselway n uḥric n waman iwakken ad asen-d-ɛiwden iteyyuten n waman imi azal n 10 wagguren aya ur ugimen ara deg waman id asen-d-yettawḍen s axxam acku xelḍen d wid ur nzeddig ara.
Lwali amezwaru iwaɛd-iten ad yili ubeddel deg uḥric-agi n waman, dacu kan asmi d imeslayen i yeqqimen deg unnar n uṛeggem, ladɛa segmi akka imḍebber-a yettwabeddel ɣer twilayt-nniḍen. D ayen i yeǧǧan imezdaɣ n Rafur, ass n 10 di yibrir iɛeddan, ḥebsen ɣef lxedma, qeflen akk tiḥuna seg 08n sbaḥ ar 10, xedmen yiwet n tikli n yimdanen meẓẓi meqqar seg taddart-nsen armi d assu n Mceddala, ssutren aman izedganen. Uccen Arezki, yiwen seg yiɛeggalen n taddart, yenna-d : « mačči d awezɣi i d-nessuter i yimḍebbren, neṭṭalab di lwali d uselway n uḥric-agi n waman ad aɣ-d-segmen s lemɣawla ugur-agi n waman di temnaḍt n Rafur, acku ayagi yezmer ad aɣ-d-yeglu s waṭas n waṭṭanen, tin yernan ɣur-s imezdaɣ-is ɛyan deg usiwed n yibidunen n waman seg udrar iwaquren armi d Rafur.
Kahina. A