Tuččit, llebsa, tissit, axeddim, d wayen yak icudden s umata ɣer tudert n yal ass n wemdan, yessexṛeb-iten ubeddel, winna s wayes d-yegla unerni n ṣṣenɛat lak d win d-ebbi tatiknulujit. Ger yiḍelli d wassa, yettwabeddel maḍi amek nsebbay, amek nettlus, amek nesseḥmuy, netteddel, nqeddec, nessirid, nleḥḥu …
Di tallit-agi deg ayeg nella, ttawilat ɛummen.
Zzik, imdanen uqbel ad d-ers tegrest n cetwa ad ilin heggan-as ttawilat s wayes ara tt-qablen. Tiqucḍin n yesɣaren n tzemmurt neɣ wid n teslent, d-eksen yuɣ lḥal deg unebdu akken ad ten-efken i lmal-nsen ad čen ifer-nsen, ad ten-t-afeḍ setfen-t tama n wexxam. Rennun-d ula d tid n wezzu, acku di cetwa ttiṛḍiben yesɣaṛen ayen yessiwɛiṛen i tmes ad tekker deg-sen. Iqejmuṛen xedmen-t-en d tirect di tallit n iweǧiben. Anda yella wesɣaṛ zedment-id. Akken mi yekkat ageffur neɣ adeffel ur ttaḍne ara aqerru-nsen. Zzik cetwa tettiqbiḥ mliḥ, mači am tura. Adeffel ittsuddu tiwwura ɣef teɣzi n ledwaṛ. Ssem-is xas yefsi, ur ittekkes ara. Ladɣa tiṣebḥiyin, neɣ mi yeɣli yiṭij. Ayen d-heggan cwiṭ, acku mači i wseḥmu kan i sexdamen isɣaren, ul d asewwi yissen. Zyada ɣef yesɣaṛen imdanen dehhun-d ula d ikufan-nsen. Deg iweǧiben ulac lxiṛ ur nettili ara deg-sen : lexliɛ, seksu d tberkukest yeqquṛen, acerrid, lɛeds, ibawen, lḥemmeẓ, awren, irden, acedluḥ, iḥbuben, llubian n leqbayel d wayen nniḍen. Deg yiwet tama n tzeqqa, ttaliqen ɣer sqef isalaqen n lebṣel, wid n ticcert lak d wid n ifelfel azeggaɣ. Taṭṭaṛt ad tili tuɣal ak ɣer tbellaṛin. Ula d lmal-nsen ttheggin-as d tuččit d wayen ara yessu. Yiwet n tama deg udaynin ttsettifen deg-s ticekkaṛin n temẓin, tid n uxeṛṛub. Ttejmaɛen-asen ula d alim i wuči lak d wussu. Akka, mi yella wacu ara čen d wayen ara seḥmun imdanen ur ttagaden ara ad qablen tagrest n cetwa, xas akken illa melmi uqbel ad teffeɣ, akken ad teǧ amkan i tefsewt, yettlili kullec. Ayen ten-ittaǧan ad-fɣen ɣer lexla ad nadin ma yella wacu d-xellef tegrest, am taga, tibidest, lleft, taɣeddiwt, d yemɣan nniḍen. Aṭas n uheggi id-yettilin i lmen-d n cetwa. Mi d-yeɣli usemmiḍ, igefrawen d ideflawen, times ur tettnus ara deg lkanun alama d lawan n yiḍes. Lkanun iseḥmuy tafekka lak d wulawen, acku yessemlalay-ed yak iɛeggalen n twacult. D tagnitt akken d-eḥkun ɣef teqdimin d wahilen ttheggin ad ten-id-xedmen ɣer zdat. Sqerdicen uguren-nsen, ttafen-d tagnitt akken yal yiwen ad d-yefk tikta-s. Ayen yak d-sewwayen-t tlawin, ama ɣer imekli neɣ imensi, d ayen iseḥmuyen taɛebbuṭ, ladɣa seksu, taberkukest, tacebbaṭ, acerrid, d leǧwazat yemxallafen. Mi yewjed, tama n tmes ara d-ers tbaqit ɣef ayeg ara d-ezzin yak iɛeggalen ad čen s teḍṣa d wecmumeḥ. Mi tezdi lehwa, ittewwa-d lexfaf, lemsemmen, tiɣṛifin,…
Lawan n tguni, uqbel ad alin ɣer tkanna, yiwen wadeg yettilin di tzeqqa, nnig n udaynin ( lqaɛa n tkanna d sqef n udaynin anda ttilin lmal), iɛeggalen n twacult ttɛemmiṛen irrij ttawin yid-sen akken ad qden iḍaṛṛen-nsen uqbel ad kecmen ɣer wussu.
Xas akka tudert maci d tin isehlen zzik, maca imdanen zemren i yiman-nsen xas akken ctawi qebḥen-t mači d kra. Deg wexxam ur tixiṛen ara ɣef lkanun, mi ara fɣen zgan ttrusen akken iwata ayen yettqerriɛen fell-asen aṭṭanen.
Zenia Thiziri