Γef wakken i tt-id-yufa Othmane Saâdi, Qsenṭina d tamurt n Waεraben si zik. Xas akken yenna-d d Imaziγen i yellan deg-s uqbel akk imnekcamen u yeḥken deg-s Syphax d Massinissa meεna, Qsentina d taεrabt si zik. Ruḥ tura kečč fhem-itt. Acu kan γur-sen ddunit ur teddewwir ara, ay k-id-yefnan d tardast n wakal ! ugur ameqqran γur-s d akken ara d-yeqqar nekk d Amaziγ meεna d Aεrab ! Cwi kan nekni d Leqbayel mačči d Imaziγen-agi-ines. Tili terwi, alamma s ADN ara d-naf imawlan-nneγ !
Othmane Saâdi ara aγ-d-yemmal amek yenker laṣel-is i wakken ad neddu di lateṛ-is. Ha-t-an uxabit-nniḍen !!! Ma tγileḍ Leqbayel ttun asmi i tessutureḍ di syad-ik, timura n waεraben, i wakken ad seyyfen imḍebbren n lezzayer ur sṭeεrifen ara s tmaziγt deg useggas n 2001, ay ‘’Amaziγ’’ ?
Aya, yebda-d imi Idir akked Ait Menguellet ugin ad γennin di ‘’Qsenṭina, tamaneγt n yidles aεrab’’. Ugin ad γennin axaṭer sεan sebba. Yal wa s tekti-ines. D tagi i d tilelli n ucennay. Ula d tacennayt n Lubnan Faïrouz ur tettγenni ara. Meεna acimi ur yezεif ara fell-as, ulac acu i as-yenna ? Yettban, axaṭer d taεrabt, ma ulac ad rfun syad-is. Yezεef γef yicennayen iqbayliyen axaṭer yiwen yeqqar-asen :’’di cetla-nsen i tt-ufan, di txessart i d-ttlalen…’’ Ma d wayeḍ yettmeni-as :’’ ad teḥluḍ si…ncallah…’’
La d-yeqqar, di&gamma,; i wacuγer Ait Menguellet ibedd ddqiqa n tsusmi, di Zenith, γef yineγmasen n Charlie Hebdo imi wigi wwten-d di Nnbi ? Am wakken, dγa, ur yeẓri ara belli axxam n Rebbi s timmad-is yelḥa di Fransa netta Qatar γer tama n Holland ?
Yewwet-d ula di M.Mεemmri d S.Chaker. Γef wakken iwala d nutni i yessaγen tamsalt-agi n tmaziγt imi d-nnan Tafriq n ugafa n yimaziγen mačči n waεraben. ‘’(An)wa kem-iqeṭṭben a tilawt, win tufiḍ deg-neγ yewwet !’’ i as-yenna Zedek.
Teḍra yid-k a Othmane Saâdi am wakken i as-yenna Matoub :’’tettγaḍ tejra n llim, mi as-εawden ttelqim, teḥced tuγal d isγaren.’’ Ihi, d tagermumut-ik kan i d-yeggran, tlaq kan i lkanun. Deg yidurar n leqbayel, meqqint-d srid tzemrin, ur ḥwağğent ara ttelqim.
Ulayγer rregmat deg yimdanen i ak-yifen ay amγar n ’’terga uγanim’’. Imγaren γur-neγ d izemniyen, ttweṣṣin-aγ γef wayen yelhan, γef tayri gar yimdanen, γef laṣel-nneγ. Laṣel refdent tsuta yefkan lεehd i Dda Lmulud.
Anda ara tedduḍ a Othmane Saâdi, ha-t-an ugeswaḥ n Dilem Ali di Charlie !?
Hocine.M