Imi yettili-d umussu asdukklan deg yirebbi n tmetti, simmal ḍerrun-d uḥerrek d uqeddic, simmal yuttuɣal-d wannect-nni s ubaɣur (lfayda) i temnaḍt merra. Tesɛa tɣiwant n Ayt Smaɛel ugar n 20 n tdukkliwin, yal yiwet deg wanwa annar i tqeddec. Ta tmal ɣer yidles, ta ɣer tmetti, ta ɣer waddal, tayeḍ ɣer usegmi, ɣer ddin…atg. Maca, wiss ma nmuqel amek i d-yettili warmud (activité) sɣur-sen deg teɣzi n useggas, ma ad naf ahil d win yeččuren, d alemmas, neɣ d ilem cwiṭ s umata ?
Akken i d-nenna, ɣas aṭas n tdukkliwin i d-yennulfan deg Ayt Smaɛel yal yiwet deg taɣult, maca gar tid iqeddcen akka tura drus i yellan. Ad d-nebder Tiddukkla Tadelsant Adrar n Fad s umsizwer-is n tmedyezt, win n yiqennucen, asfuggel n yimulliyen imaziɣen, asebɣes n yinelmaden, asker n trebbuyaɛ n uẓawan, d waṭas n yiqeddicen nniḍen. Tiddukkliwin «Tiɣri» d «Tafat n Lɛali» (Nur El Iḥsan), ɣas nnulfant-d ilindi kan, aṭas i xedmen i lfayda n tmetti, n umeɛḍur, n umuḍin, d uẓawali.
Deg wayen yeɛnan aḥuddu ɣef twennaḍt, ala Tiddukkla Tussnant Takulujit Takkuct i yettḥerriken cwiṭ ayyuren iɛeddan. Deg uḥric n waddal daɣen, aṭas n tdukkliwin i ɛerrḍen ad ddunt i yidis n yilmeẓyen, am Terbaɛt Tanaddalt Tabujadt Asirem, s taggayin-is (catégories) n ddabex n uḍar, Hapikidu, d uqdac n tmaẓwalin.
Tiddukkla Tanaddalt Tadukkli n tazzla, Tarbaɛt Tanaddalt n Karaṭi, Tarbaɛt-nniḍen n waddal n YusikanBudu. Yuɣ lḥal, nger tamawt dakken d leqdic n tdukkliwin n waddal i yezgan wala win n tdukkliwin-nniḍen.
Deg yiwen n waqqa, llant tdukkliwin d timeẓyanin bdant la d-tteffɣent i wannar, am tdukkla Tinmettit Tadelsant Tamellaḥt. Tarbaɛt Tanaddalt Tabujadt Itri, Tidukkla Tinmettit Timɛiwna. Akked Tdukkla Tadelsant Tinmettit Tagmat. Imi i d-iban wazal n tdukkla d wayen tettag deg taddart, yessefk anadi ɣef wahil n tdukkliwin-a d wuguren i tent-yettaǧǧan senqasent deg warmuden.
Mhenni Khalifi