Mačči aṭas-aya segmi i d-yessufeɣ umaru-amedyaz adlis-nniḍen ɣer teẓrigin tiliktrunanin Lulu.com, s uzwel « Akka i yettmeslay Zarathoustra ». Akken i d-teqqar dɣa tefyirt-a, adlis-a d tasuqilt i iga Mass Ayt Sliman i udlis anasli i yura ufelsuf Alman Friedrich Nietzsche. Akka tura, wid yeṭṭafaren tafarest s tutlayt tazwawt d yimeɣriyen s umata, abeɛda iminigen, zemren ad d-aɣen adlis-a seg wadeg n Lulu.com kan, di leɛḍil ad d-yeffeɣ ɣer teẓrigin n tmurt. S wugar n 397 n yisebtar, yeɛreḍ umaru ad d-yessezgi i tezwawt iḍrisen at tektiwin timaḍalanin n ufelsuf-a yettwassnen deg ukuẓt n tɣemmar n ddunit. D asenfar i yebda seg waṭas-aya, imi mačči d ayen isehlen usezgi n udlis akken yebɣu yili, tugart tugart tifelseft. Ilul Ḥamid Ayt Sliman deg Yiɣerbiyen, taɣiwant n Tmizart, aseggas n 1957. Yura ar tura ugar n ṭam n yidlisen, gar tsuqilin, ungalen d yisefra. Ad neɛreḍ ad d-nawi yid-s awal deg teẓrigin-nneɣ i d-iteddun akken ad aɣ-d-yemmeslay ugar ɣef uqeddic-a aseklan.
M. K.