I tikelt tis snat i d-iḥella unaddal n wurar n Kempo n taggeyt n s ddaw n 73 n kg, Nadir Namane cciɛa n wuraɣ, deg Talɣuɣa n ddunit n MMA (Mixtes Martial Arts) i d-tesuddes tmurt n Maser, deg tmanaɣt El Qahira. Tella-d Tedwilt-agi seg 21 ar 25 furar 2018 anda ḥeḍrent 12 n tmura n umaḍal gar-asent ; Russe, Argentine, Pakistan, Tunes, Lezzayer, Brésil d tmura-nniḍen. Deg tedwilt-agi, yebḍan ɣef karḍ (3) n yihricen n 5 n dqqayeq yal yiwen, anaddal n tmurt-nna yennuɣen mgal amyurar n tmurt n Angola iwumi qqaren Aɛli, ɣas ma aswir n umyurar n Angola meqqar aṭas, maca amyurar Nadir yessaweḍ ad t-yeɣleb deg uḥwric wis kraḍ (3), deg dqqiqa tis Kraḍet (3), uqbel ad yekfu wakud n uḥric aneggaru, seld tiyitiwin i as-yesṭuqqet, ayen yeǧǧan amyurar axsim, ad yeḥbes amennuɣ. Anaddal Nadir, d yiwen n yilemẓi n taddart n At Zɛim, yettabaɛen ɣer tɣiwant n Lemɛatqa. Yebda amecwar-is anaddal seg wasmi yesɛa 10 n yiseggasen deg leɛmer-is. Iḥella-d i tikkelt tamezwarut amḍiq amezwru deg telɣuɣa n ugerzu n Tizi-Uzzu deg useggas n 2004 akked telɣuɣa taɣelnawt n tmurt n Lezzayer. Yella yetturar deg tarbaɛt n yilmeẓyen Inaddalen n tɣiwant n Lemɛatqa , anda i d-iḥella aṭas n warrazen. Deg useggas n 2006, yefren aḥric-nniḍen n uxencar, d ayen iwumi qqaren Kempo, dɣa iḥella-d aṭas n warrazen akked d tarbaɛt n Idurar n Tizi Uzzu. Dɣa deg useggas n 2016, yella d alɣuɣ n ddunit n Kempo, deg tmurt n La Romanie. Yella daɣen d alɣuɣ aɣelnaw aṭas n tikal.
Ali Zalouk