Tafaska taɣelnawt n tmedyazt i tettheyyi tdukla tadelsant “Adrar n fad” n At Smaïl yal seggwas, d tin i d-uɣalen aseggas a s utekki n 106 imedyazen. Gar-asen sin n yicawiyen n Khenchela d Batna akked yiwen n uṭergi n Tamanrasset. Wiyaḍ,; d iqbayliyen i d-yussan si yal tama. Leqdic yella-d ɣef tlata n wussan, si 25 ar 27 deg meɣres 2009, s ccna d umezgun, d yisaragen akked d uskasi ɣef tmedyazt. Rnu ɣef waya, amsizwer n tmedyazt i yettilin yal ass. Tarbaɛt ara yefren imedyazen deg umsizwer-a d Kamal Bouamara, Allaoua Rabhi, Zahir Meksem d Mohamed L‘Hacène Mahrouche, iselmaden n tmaziɣt di tesdawit n Bgayet, nutni i yefkan tlata n warrazen. Amezwaru i Takfarinas Naït-Chaâbane (Ain El-Hammam), wis sin i Nadya Benamar (Tadukli Numidya n Wehran), wis tlata i Tamsiwt Mirya Saïd n Tizi El-Qorn. Tajmilt i Dda Lmulud n At Mɛemmer d tagnit i usnerni d usnunfu n tmedyazt s wawal amaziɣ,; d wa i d iswi n tdukkli tadelsant “Adrar n fad” n At Smaïl i d-yefkan amedya igerzen, ama s leqdic ama d tuddsa. Aya dayen i yessefraḥen aṭas.
Djouher.C / Amastan.S