Nerza ɣef demma akken ad nwali asalay-a yeldin tiwwura-s seg useggas n 2007. Γas ma snat kan n tzeɣwa n uskan (salles d’expositions) i yesεa maca d amerkanti s tɣawsiwin i icudden ɣer tussna-ya n wakal. Tazeqqa n ufella iqublen tawwurt, ad naf deg-s rsen yidɣaɣen di yal ssenf mebɣir ma nettu tifelwiyin i d yettaken isallen ɣef umezruy n : lqaεa, amdan d wamek i d-ffɣen yimenẓawen, atg. Ma di tzeqqa tis snat i d-yezgan d akessar, tettuxesses i tkerḍiwin tijyulujiyin ideg nezmer ad naf akk isallen yerzan tuddsa n lqaεa n temnaḍt n Bgayet d tmurt n Lezzayer s umata. Tella daɣen deg-s temkerḍit i yesεan azal n 600 yidlisen yeεnan aḥric-a n tussna akked tzeqqan yisaragen d tameẓẓyant i izemren ad tawi 20 yimdanen. “Asalay-a, yettuneḥsab d amezwaru akk i yellan di tmurt n Lezzayer akked d tmura n ugafa n tefriqt », i aɣ-d yenna mass Mahmoudi yellan d anemhal n usalay-a. Talalit-is tella-d s leqdic n waṭas n yimdanen yellan deg unnar da di temdint n Bgayet ddaw leεnaya n PNG (Urti Aɣelnaw n Gouraya). Tuget seg tɣawsiwin i yes-sent yeεmer usalay-a i tent-id-yessasen d Pr Yves Bodeur, d netta i yellan d amusnaw deg uḥruc-a n tusssna, ixeddem d aselmad di tesdawit n Nantes (Fransa). Ar tura mazal-it iqeddec ilmend n usnerni n usenfar-a, ladɣa aya imi netta lasel-is n temdint n Bgayet.
Mokrane Chikhi