Tafaska n ccḍeḥ aɣerfan n tmura tiɛrabin d tmura n tefriqt teldi tiwwura-ines ass n tlata 07 di Yulyu 2009 di temdint n Tizi Wezzu ɣef lxemsa n tmeddit. Aṭas terbuyaɛ i d-yusan ad kkint di tmeɣra-agi : Liban, Egypte, Irak, Côte d’Iḍoire, Bouroundi, Namibie, Syrie, Burkina Faso, Palestine, Tchad, Guinẓ ; d waṭas n terbuyaɛ n tmurt n lezzayer, mlalent-d deg unnar umenzu wenber anida yal yiwet d acu i d-tewwi yid-s ad t-id-tesken i yimezdaɣ i yettrajun tameɣra-agi am waggur n lɛid.
“Ilaq ad tuɣal d lɛadda, meqqar yal aseggas ad nidir kra wussan n umerreḥ d tukksa n lxiq” i d-yenna yiwen n yilemẓi i d-yeffɣen d twacult-is ɣer tfaska-agi
Izenqan n temdint beddlen talaba s yiniten n tefriqt, yeddukel lferḥ d usirem gar yifriqen. Tameddit, tiwaculin n temdint n Tizi Wezzu ffɣent-d akken ad walint ccna agnawi n Joe Battour d Amaziɣ Kateb deg unnar n Oukil Ramdane ; si ttesɛa n yiḍ armi d tlata n ssbeḥ,; Ilmeẓyen ur ḥbisen ara ccḍeḥ,; ula d yigerdan imecṭaḥ iruḥ-asen yiḍes ddan d zzhir n tmeɣra. Ad d-nesmekti tafaska-agi tis rebɛa tekcem nettat d tfaska n Panaf i d-tsuddes tmurt n lzzayer i tikelt tis snat (aseggas n 1969) akked d useggas n 2009
Ɛebellah Ɛerqub