Γas akken ddulla teldi sin n iseččuyen n reḥma i iferqen 200 yimensiyen sɣur waggur azeggaɣ azzayri, ur d-isekfi ara. Taswiɛt-agi d tin yeǧǧan kra yikumersiyen ad ldin azal n 10 iseččuyen ilmend n lwacul yenḥafen deg waggur-agi n remḍan anda tuli ssuma n yisufar n wučči.
Gar iseččuyen-agi win n Murad. Yal ass degmi yebda remḍan, yettmuddu azal 80 lefḍur i yimdanen. Imdanen-agi, ṭṭaqa deg-sen d ixeddamen deg uḥric n lebni i d-yussan seg lwilayat yemgarraden n tmurt, ttafen-d ɣer Murad aḍebsi n ccerba, d lmakla-nniḍen. Murad, bab n usečču, yenna-d : « yiwen n ufus ur yetteceqqir ara ; melba afus n tallelt n yilmeẓyen i iqedcen seg lweḥda n tmeddit almi d tnasfa n yiḍ,; ur yezmir ara ad yeldi asečču-agi, imi ɣas ur sɛin adrim fkan-d iɣallen-nsen. » Yerna yenna-yaɣ belli ikumersiyen-nniḍen ttmuddun seslɛa s ssuma yelhan, yerna yella wanida i d-ttɛawanen s wayen iwmi zemmren. Yiwen seg yimdanen i d-yusan seg lwilaya n Sṭif, i ifeḍren deg usečču n Murad yenna-aɣ-d : « imezdaɣ n Tizi Wezzu d lkurama, wagi d asesgas w-8 ideg xedmeɣ dagi, yal remḍan yella wanida ara d-ččeɣ,; asečču-agi d win zeddigen, lmakla d tin yelhan ». S wakka, imezdaɣ n Tizi Wezzu ur ttaǧǧan ara win ara yellaẓen ladɣa deg waggur n remḍan. Tanemmirt i Murad d tmital-is !
Dalila I.