Deg yiwen udewenni i texddem Tselwayt n Tudssa taɣelnawt n yimɛelmen d iṛemmasen izzayriyen ( ONPE) i yiwen uɣmis, tuɣal-d s wawal tselwayt n Tudssa ɣer tezɣint (crise) tettidir tmurt n Lezzayer deg yiseggasen-agi ineggura, ladɣa ayen i icudden ɣer tdamsa n tmurt. Ɣef Leḥsab n Massa Samia El Makhloufi, taselwayt n Tudssa » Ad d-yili uneḥbus n qrib n umelyun n yixeddamen sya ɣer taggara n useggas-agi i deg i nella, ma yella ur d telli ara tifrat n tezɣint i ttidirent wazal n 5 800 n tkebbanit timeẓyanin d tlemmasin (PME/PMI). »
Agemmuḍ-agi n yimeḍqan n uxeddim ara iruḥen, ad yernu ɣer 600 000 n yimeḍqan n uxeddim iḥebsen s ssebba n uɣlaq n 30 000 n tkebbaniyin timeẓyanin d tlemmasin gar waggur n fuṛaṛ d yulyu iɛeddan. Tger-d tiɣri tselwayt n Tudssa-agi i yimḍebbren teɛna temsalt akken ad d-rren lewhi-nnsen i tifrat n yiɣeblan meqqren i ttidirent tkebbanit-agi n tmurt d uxlaq n uxeddim i yelmeẓyen yesɛan tikebbaniyin. Dima ɣef Leḥsab n Massa Samia El Makhloufi » Azal n 5 800 n tkebbaniyin (PME/PMI) i yeseftayen deg taɣulin yemgaraden, ladɣa deg taɣult n lebni, tadawsa, tafellaḥt d temguri ara iɣelqen tiwwura-nnsent, d ayen ad d-yeglun s ustixer n qrib n umelyun n yixeddamen ».
Tenna-d daɣen d akken » Tamguri tazzayrit ur tezmir ara, akken yebɣu yili lḥal, ad tidir kan s 9 neɣ 10 n yigrawen imaguriyen yettabaɛen ɣer yimɛelmen imeqqṛanen. » D luluf n tkebbaniyin timeẓyanin, i d xelqen yilmeẓyen yesɛan tissugra, yettwaḥesben gar yinesmalen igejda n uxlaq n tbaɣurt (sɛaya) taɣelnawt, ass-a, twaxenqen akken iwata seg yal tama, dayen ad d-yeglun s uɣlaq-nnsent ma yella ur d-yessekcem ara iman-is Uwanak i tifrat n yiɣeblan yeṭṭuqten ɣef tkebbaniyin-agi. « Tuɣal-d s wawal daɣen ɣef wayen s wacu i d-glant temsalt n tejɛal i d-yellan i seg d-glant temsbaniyin seg 22 furar iɛeddan, dayen i d-ixelqen aṭas n yiɣeblan n tukci n tedrimt i tkebbaniyin timeẓyanin’’.
» D luluf n tkebbaniyin yesɛan ṭṭlaba, ufant-d iɣeblan meqqren deg unerḍul n tedrimt seg lbankat akken ad d- xedmet isenfar-nnsent, s ssebba n ṛṛayat i iḥuzan igrawen imeqqranen i ittekkan deg tjeɛɛal d tkerkas ». Tenna-d daɣen : » Tuget n yiḥricen n tdamsa ad ten-tḥaz tezɣint n cceḥa n tedrimt d usenqes deg usefti n Uwanak deg yisenfar imeqqranen’’.
Ali Zalouk