Qrib tura tlata n smanat segmi yekkat ugeffur ɣef tmurt n leqbyel : seg 28 deg unbir iɛeddan ar ass-a, netta ur yeḥbis. Xas ulamma zrin sin wagguren ɣef tsemhut n lexrif mebla ageffur, ayen yeǧǧan lqaɛa ad tciḍ, u xas ulamma yebda lexsas n waman iceɣɣeb allaɣen n twaculin, meɛna ayen din yenser segmi i d-ɣlint tmiqqwa timezwura n lehwa ɣef lqaɛa. Yewwet ugeffur, yessi-tt udfel deg yidurar, ihuzz-d waḍu deg yizuɣar. Yuɣal-d sser n Ǧerǧer s ubernus-is amellal, uzlen yiɣezran, teswa lqaɛa. Ula d abaraj n Taxuxt, ibeddel udem send mi yella ḥenturi, banen-d akk yiẓra-s akked lqaɛa-s, llan kan deg-s azal n 16% n waman.
Mačči d abaraj kan i ten-yuɣen mi akken ur d-yeɣli ugeffur, maca ula d tiliwa d yiɣbula, bdan ttɣaren neɣ ttenqasen deg-sen waman s waṭas, ayen yeǧǧan kra n yimdanen ad xemmen ɣef wamek ara qablen taswiɛt ladɣa deg tudrin i d-yezgan deg udrar. Cwi kan, tbeddel teswiɛt, yedda-d ’’Unẓar’’ deg lebɣi, yeɣli-d ugeffur d iḥemmalen, yewwet usyax deg yiɣezrwen, nneflent kra n tregwa…atg.
Acu kan, igefran-agi, glan-d s kra n lemḍerrat yecban aseyax d uɣlaq n yiberdan, ɣelluy n waṭas n yiẓra deg yiberdn, anegzum n trisiti, iḥemmalen deg temdinin…Ɣef ssebba n wanect-a dɣa i ttwaɣelqen kra n yiɣerbazen akked yimekwan n uxeddim. Ɣef wakken i t-id-nnan kra n yimḍebbren akked yiselwayen n tɣiwanin, mačči kan d ageffur i ssebba n yiḥemmalen i ittazzalen deg yiberdan, meɛna tella ssebba i d-yekkan ɣer umdan imi ittargal tiregwa ansi leḥḥun waman s yiḍumman-s akked sselɛa i d-yettheggi i lebni i ittaǧga ɣer tama n tregwa n waman.
‘’Sselɛa-agi, ttawin-tt waman, syin sergalen tiregwa’’ i d-yenna yiwen yimḍebber i ikemmlen deg wawal-is ‘’Tamsalt, teɛna akk medden, mačči d taɣiwant kan. Xas ulamma nferres tiregwa, meɛna ttuɣalent akken llant s yiḍuman akked sselɛa n lebni’’. Sg tama n yimezdaɣ, yuɣal llum ɣef tɣiwanin akked yimḍebbren ‘’Ad arǧun alamma yella-d uḥemmal, syin ad d-azlen ɣur-s. Urǧin heggan lecɣal deg lawan-nsen, urǧin xemmen ɣer sdat deg leqdic-nsen. Ilaq-as uxemmem i ubrid, tlaq-as tmuɣli tussnant i lebni deg temdint, ilaq uheggi deg unebdu i cetwa. Akken qqren ’Leḥder yugar leqḍeɛ’. Nutni, teddun ass s wass, ulac akk tastratijit’’. Akka iwala yiwen urgaz i tḥuza tyita n tḥemmalt. Akken yebɣu yili, d asemmiḍ neɣ d aḍu, d ageffur neɣ d abruri, s tegrest i tettili tefsut.
Hocine Moula