Seld ayendin n lɣiba n ttbut ɣef melmi ara d-yeffeɣ uḍebsi-s amaynut n 2019, d utqelleq d uraǧu ɣur medden i t-iḥemmlen, a-t-an iberreḥ-d ussan-a unaẓur Zedek Mulud deg usebter-is unsib n Facebook s wazemz n, 27 tuber 2019, i tuffɣa n yiseɣrez-is, ama di Tmurt neɣ di Fransa. Ilaq ad d-nini aṭas i yeffeɣ ssber ɣef melmi ara ḍillen ɣef umaynut n Zedek Mulud d wayen iɣef yessefra, neɣ d tlufa i yesleḍ di tallit-a iɛeddan. Ladɣa ma neẓra belli tura tewweḍ ɣas ad d-nini ɣer semmus n yiseggasen segmi i d-yesres deg ulzuz aqeddic-is anaẓuran aneggaru s uzwel n « Asderfef » di taggara n 2014.
Ma nemmeslay-d cwiṭ ɣef wayen ara yilin di tmuqint-a tajdidt n uẓawan d usefru n mmi-s n At Xelfun, ad d-nebdu seg wayen i d-yessufeɣ s wudem azayez i lmend n tuzzya tamaḍalant, d wayen i d-yecna ihi ɣef usayes ama di Tmurt neɣ berra-s. Imi yetturaǧu ad tili deg yiseɣrez-a amaynut tezlit « Allen swant, imi yeffud » ideg yessemlal tilufa n tmetti d tsertit. Daɣen, yewwi-d ad d-teddu ula d tizlit « Teqqleḍ d lɣerba a Tamurt » s wayes i d-yemla kra n tmentilin i t-yeǧǧan yezdeɣ tura di Fransa akked twacult-is. Ugar n waya, iqarr-aɣ-d Zedek Mulud deg yiwet n tdiwennit i as-nga imalasen yezrin d akken ihegga yiwet n tezlit d tajmilt i umeɣnas Si Lḥafiḍ i lmend n uḍebsi-a n 2019. Ula d yiwet n tezlit ɣef Yennayer iban-d lḥal ad tili daɣen, rnu yecna-tt s wudem ara iḥazen akk Imaziɣen n Tmazɣa. Ad d-nesmekti d akken ɣef wakken i aɣ-d-yenna Zedek Mulud, yewwi-d ur tettili deg yiseɣrez tezlit-nni « Amremmu » meskud yesres-itt-id yakan deg terga-s n Youtube. Ur yettɛeṭṭil ihi uḍebsi ad d-yeffeɣ, imi ur ilaq ad t-yezgel yal Azwaw.
M. K.