I lmend n usmekti n umulli amezwau n tmettant n unaẓur Ǧamel Allam, tuɣal-as tejmilt deg Uxxam n yidles Mulud Mɛemmeri n Tizi Uzzu. Tebda leqdic-a, iḍelli n lḥed 15 cutember 2019, ad tkemmel ass-a n letnayen 16 deg waggur-a. Gar leqdicat idelsanen, i d-yellan ad nebder tirza ɣer uẓekka-s d usersi n tmuqqint n yijeǧǧigen. Am wakken i d-llant temsikniyin ama ɣef umecwar-is di tẓuri (ccna akked yisura) akked tudert-is d yimuhal-is, am wakken diɣ, i d-yettwasken wayen yettwarun fell-as akked ttsawer-is. Am wakken daɣen i tettunefk tegnit i tnagiyin d waktayen, ideg i d-mmeslayen iɛeggalen n twacult-is tameẓyant (axxam-is) d twacult-is tameqqrant (tin n tẓuri) ɣef wayen sɛeddan yid-s.
Am wakken daɣen, i yetturaǧu ad ilin waṭas n yirmad-nniḍen i wass-agi wis sin n tejmilt-a. Ad d-nesmekti kan belli Ǧamel Allam, yella d acennay d azeffan diɣ, imi yurar deg waṭas n yisura n teqbaylit. Ilul ass n 26 yulyu 1947 di Bgayet, ɣur-s ugar n 10 n tesfifin. Rran-as tajmilt deg Tezrigt tis 17 n tfaska tadelsant n usaru amaziɣ s wudem-nniḍen. Yewweḍ leɛfu rebbi ass n, 15 cutember 2018, deg temdint n Paris, di tmurt n Fransa, di leɛmer-is ala 71 n yiseggasen.
H. M.