Accueil Tamazight Ayen din d leqdicat, sya u sya

BGAYET - Asmekti n umulli wis 21 n tmenɣiwt n Meɛtub Lwennas

Ayen din d leqdicat, sya u sya

49

I lmend n usmekti s umulli wis 21 n tmenɣiwt n ucennay aɣewway Meɛtub Lwennas, yuget leqdic adelsan deg tmurt n leqbayel merra akked tmura tiberraniyin (Fransa d Kanada).

Ass n ttlata 25 yunyu 2019, ad zemmen 21 n yiseggasen ɣef wasmi i d aɣ-yeǧǧa yitri n ccna amaziɣ, i wumi mazal ṣṣut-is yettbeɛziq. Dɣa dagi di tmurt, yettili-d leqdic adelsans wazal-is i lmend n usmekti-agi wis 21 deg lwilaya n Tizi Uzzu d Bgayet.

Di Ticci, d Axxam n yidles Idir Ɛacur n Bakaru, i d-yesdurin ahil n tidukla tadelsant Asaki, i d-iheggan sin wussan n usmekti, s waṭas n yiremad idelsanen. Ass-nni n lǧemɛa, tella-d temlilit taseklant d uskasi akked umaru d umedyaz Yasin Ḥebbac, i yewwin awal ɣef umennuɣ n umedyaz d ucennay Meɛtub Lwennas. Imeslay-d daɣen umeskar-agi ɣef udlis-is i wumi isemma “Lwennas Meɛtub, neɣ abrid ɣer umyit”, i d-yessuffeɣ ɣer tezrigin tafat.

Sendiḍelli n ssebt, wass n usmekti wis sin n tiddukkla-agi, ddima deg Uxxam n yidles Idir Ɛacur, yebda leqdic-a, ɣef 10h d tasawent, s ddeqs n temsikniyin, yerzan tudert d umecwar n ucennay aqbayli, yefkan iman-is d asfel i tmaziɣt. Tettunefk daɣen tegnit i tmeɣra n ccna, ideg i d-ttwacnant aṭas n tezlatin-is yeččuren d iḥulfan, i mazal anza-nsent deg yimeẓẓuɣen n medden. ɣef 14h n tmeddit, yella-d usarag d uskasi, sɣur umaru Allas Di Tlelli akked Nadya Meɛtub, d taǧǧalt n ucennay ameqqran Meɛtub. Yezzi deg-s wawal ɣef usentel-agi: “Meɛtub Lwennas: akkin i unaẓur, d amdan bu waṭas n tsektiwin”.

Mi yessuli usarag-agi, tettunefk tegnit i usteqsi n yimsirgen-agi i d-yellan d inebgawen n lqahwa taseklant n Ticci. Yetturaǧu, ad d-tili tmeɣra meqqren tameddit n wass-agi ɣef 19h30 n tmeddit deg Unnar Aɣurbiz n Bgayet. D leqdic ara d yilin s lmendad n Nadiya Meɛtub d tidukla Meɛtub Lwennas i usmekti d usiweḍ, tameddit-agi deg lwilaya n Bgayet.

D tameɣra n tejmilt, ideg ara cennun ddeqs n yicennayen imeqqranen, yecban Uleḥlu, Ali Ideflawen, Malika Dumran, Zeddek Lmulud akked waṭas-nniḍen.
Adaoun Abdelghani