Tura tuɣal d tannumi, seg useggas n 2017 i tebda tezrigt tamezwarut n Rreḥba n udlis deg umḍiq n tẓuri “Ezzou’Art” n Ssuq n tunzut n Bab Ezzouar, yellan deg telmmast n temdint n Lezzayer Tamaneɣt.
Yal aggur n yebrir yessuddus-d umḍiq-agi n tẓuri d yidles aggur aseklan, i d-yettilin yal taggara n ddurt (lǧemɛa d ssebt). Aseggas-agi, yebda usiher-agi ass-nni n ssebt 06 di meɣres 2019, yetturaǧu ad yesali ass n ssebt 27 yebrir 2019. Tazrigt n useggas-agi, aṭas n umaynut i d-yettilin deg-s, gar yizenza s ubuddu, taɣuri n tmedyazt, isaragen, isikwan…atg. Ayen i d-yufraren deg wahil-agi, d isenza s ubuddu sɣur ugar n snat n tmerwin (20) n yimura n tmurt i isenzen idlisen-nsen. Ad d-nebder gar-asen Ahcène Mariche, Idir Bellali, Mohand Nait Abdellah, Rabah Benamghar, Ouarda Akif, Omar Idir, Nassima Yahiaoui, Zoubida Tazerout, Ahcène Begriche… Am wakken daɣen i tettunefk tegnit i yimura d yimedyazen ilmeẓyen, i wakken ad d-siknen ayla-nsen, ad d-nader gar-asen: Rachida Bensidhoum, Lynda Leroul, Farida Sahaoui… D idlisen yemgaraden ama deg tewsit (ungalen, tamedyazt, timucuha), maca d tamedyazt i yeṭṭfen amur ameqqran n yidlisen i d-wwin yimura-agi i d-irezzun yal taggara n ddurt. Wa yettaru s teqbaylit, wa s tefransit, wayeḍ s taɛrabt, tella ula d taglizit. Ɣer tama n yisenz-agi s yibuddan, ttilin-d diɣ leqdicat-nniḍen idelsanen. Sendiḍelli n ssebt, tella-d tegnit tmedyazt, anda i d-yemmeslay umaru imsuqel Idir Bellali ɣef yidlisen-is imaynuten. Am wakken diɣen i d-tella tɣuri n yisefra akked usikew n tira d tɣuri. Ma i wass n ssebt i d-iteddun, yetturaǧu ad d-imeslay umeskar Aziz Djaouti deg usarag-is ɣef tesfift n wunuɣen (Bande Dessinée). Am wakken diɣ ara d-tili tegnit n tmenna n yisefra sɣur ddeqs n yimedyazen ɣer tama n usikew n tzabut. Ma d ssebt aneggaru n waggur-agi, yetturaǧu ad yili deg-s usissen n udlis wis 11 n umaru Mourad Touak, i d-yettmeslayen ɣef “La Psychologie”. Am wakken daɣen i yetturaǧu ad tili tejmilt meqqren i Yousef Saiah, i yellan d aneɣmas n rradyu d tilibizyu n lezzayer.
Ghani Amazigh