Sendiḍelli n ssebt, 13 yulyu 2019, i tessuli tezrigt tis kraḍet n tfaska n tmezdyazt “Tawwurt n Lɛinṣer” n taddart n Ait El Kacem deg tɣiwant Assi Youcef, di Boughni.
Tazrigt-agi tis tlata, gan-tt d tajmilt i umedyz Ahmed Lahlou, i d-yefkan aṭas i tmedyazt taqbaylit. Mbeɛd tlata wussan n temsizzelt n tmedyazt gar 31 n yimedyazen, i d-yerzan seg Tubiret, Bgayet d Bumerdas akked Tizi Uzzu, bannen-d yigemmaḍ ineggura n tfaska-a.
Arraz amenzu, yufrar-d yis-s umedyaz ilemẓi Bouaam Mohamed Arezki n taddart Tighilt Mahmoud di Maatkas. Rrnan diɣ fkan rebɛa warrazen-nniḍen i rebɛa-nni n yimedyazen i d-yusan seg yimḍiqen-a: Wis sin, wis tlata, wis rebɛa akked wis xemsa.
Syin akkin, ɣef 21h30 n yiḍ, tella-d tmeɣra n ccna sɣur ucennay Ramy Fares d Ali Ferhati. Maca, uqbel ass aneggaru n temsizzelt, i d-yellan ssebt-agi deffir-nneɣ, llan-d aṭas n leqdicat-nniḍen. Dɣa deg wass-nni amezwau, i d-yellan ass-nni n larebɛa 10 yulyu 2019, mbeɛd tulya tunṣibt n tezrigt-agi tamaynut.
Ɣef 20h30 n yiḍ, yella-d uḥric amezwaru n temsizzelt n tmedyazt, deffir-s kan yella-d usiher n umezgun s ṣṣenf n monologue. Deg wass-nni wis sin, lexmis, 11 yulyu 2019, ɣef 09h30 n ssbeḥ, yella-d usarag n Mass Laouari Boukhalfa ɣef tmedyazt n ucennay ameqqran n teqbaylit Lewnis At Mengellat. Tin ɣur-s, ɣef 15h00 n tmeddit, llint temsikniyin yemgaraden, tid n yidlisen, tid i d-yewwin ɣef tudert d umecwar n umedyaz Ahmed Lahlou, ɣer tama n temsikniyin-nniḍen, yecban, taqendurt n leqbayel, azeṭṭa, lḥelwa…atg.
Ikemmel uḥric wis sin n temsizzelt ɣef 20h30 d tasawent, deffir-s kan, tella-d turart n tmezgunt-nniḍen. Ass-nni n lǧemɛa, 12 yulyu 2019, kemmlent temsikniyin ɣef teɣzi n wass, ma ɣef 20h30 n yiḍ, tella-d taggara n temsizzelt n tmedyazt, ma ɣef 23h00 n yiḍ, yella-d usiher-nniḍen n teḍṣa, i d-yellan sɣur ugraw Lewhama. Ad d-nesmekti belli tafaska-agi n tmedyazt “Tawwurt n Lɛinṣer”, d Tiddukkla tadelsant Tafat n taddart n Ait El Kacem akked Teseqqamut n taddart-agi, i t-id-yesdurin, ɣer tama n tuddsiwin-agi : Aseqqamu Aɣerfan n Lwilaya (APW) n Tizi Uzzu, Tanmehla n Yidles n Tizi Uzzu, Axxam n Umezgun Kateb Yacine d Useqqamu Aɣerfan Aɣiwan n Assi Yousef.
Tazrigt-agi tis tlata n tfaska n tmedyazt taqbaylit “Tawwurt n Lɛinṣer”, gan-tt abrid-agi d tajmilt i umedyaz ameqqran Ahmed Lahlou. Ma d tin useggas iɛeddan, rran-tt d tajmilt i ucennay Mouh Said Oubelaid. Ma ɣef umaynut n tezrigt-agi, yenna-d Mass Belaidi Mhamed aselway n Tddukkla Tafat: “Amaynut n tezrigt-a, yebda-d s uttekki n yimedyazen imaynuten, imi tuget n wid ittekkan ur llin ara deg tezrigin iɛeddan. Tkemmel s wahil anesbaɣur d tegnatin yelhan ideg tɛedda.
Tessuli s uswir ɛlayen n tmedyazt akked yimedyazen imaynuten i d-yufraren”. Ikemmel imeslay-d ɣef tejmilt-agi i d-as-rran i umedyaz Ahmed Lahlou, dɣa iberreḥ-d s waya : “Annect-agi d lwaǧeb fell-aɣ, i lmend n wayen i d-yefka i teqbaylit d tmedyazt-is”. Ma si tama-s Mass Bouaam Mohamed Arezki, bab n warraz amenzu n tfaska-agi, yenna-d: “Arraz yiffen akk arrazen d timlilit-agi gar yimedyazen, mačči d iccer-nni kan n lkaɣeḍ.
Di tazwara, ferḥeɣ s uswir n tmedyazt iwumi nesla, syin akkin, yennekmal lferḥ-iw s warraz-agi swayes i d-ufrareɣ gar wanncet-nni n yimedyazen, yettfeṣilen awal. Arrazen yecban wigi neɣ tifaskiwin-agi iswi-nsen d asebɣes n umedyaz d userni n tutlayt d tmedyazt. Awi yufan, yal tamnaḍt ad tesɛu akka tafaska i yiman-is ama di tira neɣ d ccna imi d aya i tḥewaǧ teqbaylit ass-a”.
Ɣer taggara maḍi, ad d-nesmekti belli Ahmed Lahlou, yewweḍ leɛfu rebbi deg 02 yebrir iɛeddan, di leɛmer-is 54 n yiseggasen, mbeɛd aṭṭan iḍulen. Yella d amedyaz, yettfeṣṣilen taqbaylit am wakken diɣ i yurar deg waṭas n tmezgunin. D netta i d-yuraren ddur n umedyaz Si Muḥend u Mḥend, deg usaru-nni yettwaxdamen ɣef tgejdit n tmedyazt taqbaylit Si Muḥend u Mḥend. Yella diɣ d aɛeggal deg teseqqamut n ufran n tfaska-a deg snat-nni n tezrigin iɛeddan.
Adaoun Abdelghani