Accueil Tamazight D lwilaya n Tlemsan i d tamezwarut s watug n 68,46%

ASEGMI AƔELNAW Banen-d yigemmaḍ n ukayad n BAC

D lwilaya n Tlemsan i d tamezwarut s watug n 68,46%

152
- PUBLICITÉ -

Ass-nni n larebɛa iɛeddan, lewhi n 15h00 n tmeddit, i d-banen yigemmaḍ n ukayad n usegmi asinaw (BAC), i useggas-agi aɣurbiz n 2019-2020. Leḥsab n wid i t-id-yewwin yewweḍ ɣer 55,30% deg wakal aɣelnaw.

- PUBLICITÉ -

Atug-agi n wid i t-i-yewwin aseggas-a, yuli ugemmuḍ-is amacemma s wazal n 0,74% ɣef winna n yilindi. Imi, deg useggas iɛeddan, yelḥeq watug n rrbeḥ ɣer 55,30%, ma deg useggas aɣurbiz n 2019-2020, yewweḍ ɣer 55,30%. Akayad-agi n BAC n useggas-a, i d-yellan deg tegnatin yemgaraden ɣef tezrigin iɛeddan s ssebba n waṭṭan n Kuruna, yella-d usɛeddi-ines deg tlemmast n waggur n cutember iɛeddan, mačči deg waggur n yunyu, akken nuɣ tanumi. Am wakken diɣ i d-yella uṣubbu n tezmilt n uɛeddi ɣer 9/20 mačči 10/20, akken i d-yettilin yal aseggas. Annect-a, d rray i yeddem uɣlif n usegmi aɣelnaw, kra kan n wussan uqbel uberreḥ s yigemmaḍ-a.

Ad d-nesmekti kan belli, tazmilt n uɛeddi seg uswir amenzu, tella-d 4,5/10 mačči 5/10, yerna ur d-yelli ara ukayad n 5eme. Ula deg uswir alemmas, tella-d tezmilt n uɛeddi d 9/20, ula d wid n uswir wis ukkuẓ (4AM). Ma deg wayen yerzan amyezwar n lwilayat i tezrigt-a n BAC 2020, yella-d ubeddel meqqren deg-s. Tikkelt-agi, d lwilaya n Tlemsan i yeṭṭfen taqacuct n umyezwar aɣelnaw. Tekkes-as amkan-is i lwilaya n Tizi Uzzu, i yeṭṭfen taqacut-a i wazal 12 n yiseggasen, imi seg 2008, d nettat i d-yettifriren d tamezwarut.  Amyezwar n xemsa n lwilayat i useggas-a aɣurbiz 2019-2020, yella-d akka : deg umḍiq amezwaru, ad naf lwilaya n Tlemsan s watug n 68,46%, deffir-s kan, ad naf lwilaya n Bumerdas, teṭṭef amkan wis sin s 65,34%, syin d lwilaya n Lemdiya, deg umḍiq wis tlata s watug n 64,98%. Ma deg umḍiq wis rebɛa, d tanmehla n usegmi n Usamar n Lezzayer, yellan di Lezzayer Tamaneɣt, i t-yewwin s watug n 64.26%.

Deg umḍiq wis xemsa, ad naf lwilaya n Mɛesker, atug-is n rrbeḥ yewweḍ ɣer 63,48%. Ma deg wayen yerzan amyezwar n tuzzagin n ukayad, ad naf deg umḍiq amezwaru, tuzzagt n tusnakt s 80,22%, deffir-s kan tuzzagt n tutlayin tiberraniyin s watug n 67,78%. Ma tuzzagt n tusnakt tatiknikt, teṭṭef amḍiq wis tlata s watug n 58,48%, deffir-s kan, tuzzagt tussna tanarmayt, s wazal n 56,97%. Syin akkin, d tin n tsekla d telsafit s 52,60%. Ma deg umḍiq aneggaru, ad naf tuzzagt n useddu d tdamsa, s wazal n 38,09%. Ma deg wayen yerzan amyezwar n yinelmaden, deg wakal aɣelnaw, ad naf anelmad Ɛabdeṣamad Sadiqi, n lwilaya n Tlemsan, i d-yewwin tazmilt tameqqrant deg ukayad-a s 19,20.

Deg umḍiq wis sin, ad naf tanelmadt Ṛaḥma Ɛun, n lwilaya n Lwadi, i d-yewwin tazmilt n 19,16. Ma tazmlit tameqqrant tis tlata, tewwi-tt-id tnelmadt Raca Badreddin, n lwilaya n Qsenṭina, i d-iḥellan 19,10.  Mbeɛd tiririt n yigemmaḍ-a, neqreb ɣer yinelmaden  akked yimawalen-nsen i wakken ad nẓer amek ddren tagnit-a. Massa M. F, d tayemmat n yiwen unelmad, i d-yewwin akayad-a, tenna-d : “Nekni s yimawalan n yinelmaden, ad as-tiniḍ ula d nekni nsɛedday akayad-a yid-sen. Ferḥeɣ-as i mmi d wid akk i t-id-ywwin. Armi d tura i d-nerra nnehta…”. M B. Gh, d tanelmadt di tesnawit n Buǧimeɛ, tenna-d : “Ferḥeɣ aṭas imi i d-wwiɣ akayad n BAC, yeffeɣ-iyi leɛtab ɣer tafat. Ad asen-srebḥeɣ akk akayad-a i kra n win i t-yewwin, ma d wiyaḍ ad ten-id-iɣit Rebbi qabel. Ad snemmreɣ tawacult-iw d wid i d-ibedden yid-i s tazwara…”

Ghani Amazigh

- PUBLICITÉ -