D tallit n usgunfu, n unecreḥ, n tukksa n lxiq… Sɛeddayen wat n Texliǧt tallit n unebdu s beṭṭu n wakud-nsen ɣef teɣzi n tsemhuyt-a.
Akken kan ara yekfu waggur n mayu, ad kfun yid-s yikayaden. D taggara n useggas. Ad bdun yimuras n unebdu. D tallit n usgunfu, n unecreḥ, n tukksa n lxiq… Sɛeddayen wat n Texliǧt tallit n unebdu s beṭṭu n wakud-nsen ɣef teɣzi n tsemhuyt-a.
Ssuddusen-d timliliyin n ddabex uḍar gar yimeddukkal, ttalin ɣer unnar i d-yezgan s nnig n taddart timeddiyin n wass, tturar dinna. Tikwal ttṣubbun ɣer temda akken kan d tarbaɛt, ad sucfen, ad ttneggizen deg waman, ladɣa mi ara izid uẓɣal. Tikwal-nniḍen, d iḍes kan deg uxxam i asen-d-yettṣiḥin, ma ur ufin ara s anda ara ruḥen, neɣ ur uzzilen ara gar yixxamen deg yizenqan n taddart, tikwal maḍi, tteffɣen-d ɣur-sen sḥaḥayen-ten i wakken ad ten-ǧǧen ad gnen di talwit.
Ma d tignatin ur d-nettuɣal ara s waṭas, mi ara d-iḥninen yimawlan, neɣ imawlan n walbaɛḍ n yimeddukkal, ad inin i tarwa-nsen “kkret fell-awen ad teddum ɣer yilel”. Akken d tarbaɛt n warrac, ad ten-gren kan deg tkerrust, ad tteddun, ad cennun alamma wwḍen. Dɣa imir i asen-d-yettuɣal rruḥ, ulawen-nsen, ttafgen seg tumert. Ṛewwun aneggez d unecreḥ deg teftist. Akka i sɛeddayen wat n Texliǧt imuras-nsen.
Ur ttuneḥtamen kan alamma ufan-d iman-nsen deg yimalas ineggura n ɣuct. Ur ttḥulfun i wakud n unebdu amek yuzzel. Ad yekcem cutember. Dɣa ad heggin daɣ iman-nsen i tuɣalin ɣer uɣerbaz. Imi d lawan, qrib ad yebdu useggas n tɣuri. Ad cemmren daɣ i yiɣallen-nsen i wakken ad d-awin igemmaḍ yelhan am useggas yezrin.
Khaled Achoui