Iseggasen-a ineggura, tenqes lbenna n lɛid, tenqes tdukli gar yimezdaɣ deg kra n tudrin d temdinin. D ayen i yerran tafaska n lɛid, truḥ-as acemma lbenna-s.
Tegra-d kan lemɣafra gar yimeqqranen, syin yal wa yeṭṭef ccɣel-is, yeqqim-d lɛid d ansay i warrac imecṭaḥ i d-yettcebbiḥen s yal iselsa, ttaɣen-d tiẓidanin d tɣawsiwin n wurar, yis-sent ad rren azal i sin n wussan n lɛid, ad ten-sɛeddin s tumert. Maca ɣas akken, isem-nni n lɛid yesɛa sser iman-is, ama d lɛid tameẓyant i ttraǧun medden s ccuq seld aggur n remḍan iḍulen, neɣ d lɛid ameqqran, d ass n tmezliwt n wakraren i wid izemren neɣ xerṣum d ass n tuččit n uksum i wid ur nezmir ara. Taggara-a, yuɣal-d wansay n tmecreḍt gar yimezdaɣ n tuddar, akken yal wa ad t-id-iṣaḥ wamur-is. Ma d taṣebḥit, ttruḥun ttẓurun-d wid i ten-yeǧǧan di temqebrin. Ihi, ass n lɛid deg tudert n wass-a ɣas ur yecbi ara leɛyud n zik, maca xerṣum yettḥulfu-as umdan d yiwen wass mačči am wiyaḍ, d ass n sser, d ass n lferḥ. Win ixeddmen lebɛid, yettezzi-d s axxam, dɣa tettemlil tasa d way turew. Aseggas-a, d addad-nniḍen, qrib kraḍ n wagguren segmi yuḍen umaḍal, kullec yeḥbes: imdanen kemnen deg yixxamen; leqdic yenqes; allalen n usiweḍ ulac… Tamentilt, d anfafad n Coronavirus i iferqen imdanen am yibawen ɣef lluḥ, aḥbib ur yezmir ad iẓer aḥbib. Aṭṭan-a, yegla-d s uwexxer n geddac n yisiharen igraɣlanen deg umaḍal, yeḥbes timliliyin n yidles, tid n ddabex, tifaskiwin. Lɛid tameẓyant n useggas-a, ad tezri am yineḍruyen-a akk iḥebsen, ur zmiren ara yimdanen ad mɣafaren, seg tugdi n unfufed n waṭṭan. Ad t-idiren yimdanen deg yixxamen-nsen, ad srebḥen lɛid s ttawil n tilifun, isawalen d yizeḍwa inmettiyen ad ilin di ttiɛad. Lɛid n useggas-a, ixulef wiyaḍ, acḥal n leqrun, ur yezri akka.
Khaled Achoui