Ass n 25 yunyu 1998, deg ubrid i yettawin ɣer taddart n Tewrirt Musa, deg ubrid n Tala Bunan, ifureq tudert unazbay, aɣewway Lwennas Meɛtub. Nɣan-t yir ifassen, wid ur nettamen s tudert, s tlelli. Ttamnen kan s wakti aderɣal, s tmenɣiwt d wayen akk n dir. Deg wass yecban assen, teḥzen tmurt n Yimaziɣen. Deg wass yecban assen, teclex-d yiwet seg tgejda i irefden axxam aqbayli. Deg wass yecban assen, tettru Tewrirt Musa am yessetma-s akk seg tudrin n leqbayel. Yesseqdec tizlit icebḥen d usefru iweznen, iḥureb war akukru ɣef yidles d tumast, yennuɣ s tmedyazt-is. Lmut-is tessefreḥ isenselmen d udabu amesbaṭli, acku d win izewwiren.
Ma yenna-d kan yiwen n wawal, agdud d tirebbaɛ deffir-s. Yecna mgal rrebrab, mgal timenɣiwt, mgal adabu i igezzmen awal i wid yebɣan ad d-sbeggnen tidet, mgal miḥyaf i d-tga tmetti. Yecna ɣef tutlayt-is, ɣef yidles-is, ɣef tugdut, ɣef tlelli, ɣef tayri … atg. Adlis-is aɣewway, d anagi yeddren ɣef Lezzayer n wass-a, ɣef yiḥulfan-is, ɣef usirem-is. Yenna-d deg-s ayen yeffren d wayen d-ibanen. Yura aɣewway akken ad d-yessebgen lɣiḍ-is ɣef wid yesmentagen ccwal, ɣef wid yettruẓun awal, ɣef wid itteffren timsal. Yemmut Lwennas; mačči anagar netta i yemmuten. Nɣan-t; yal Aqbayli iseḥḥan yettwanɣa. Yemmut, ur yemmut ara. Lmut-is d talalit, d talalit-nniḍen, d talalit n lebda i uqbayli n tidet. Gen di talwit a Mass.
Khaled Achoui