Texdem Massa Nurya Ben Ɣebriṭ taneɣlaft n usegmi aɣelnaw, yiwet n tirza n lxedma ɣer waɣir n Wehran ass n acer iɛeddan. Tirza-a, tella-d i usqerdec n kra n temsal yeɛnan aḥric n tɣuri, tapidagujit n uselmed d wuguren yellan deg unnar neɣ deg yiɣerbazen, ladɣa ayen yerzan ttawil n useḥmu i ixussen daxel n tneɣriyin. Tenna-d d akken aɣbel-a yettuɣal ɣer lqedma n wallalen n useḥmu, u tifrat a-tt-an deg usileɣ igerrzen n yixeddamen. Terna tenna-d belli mačči d ugur meqqren, acku anagar 15% deg yiɣerbazen i yettmagaren aɣbel-a. Tirza-ines tebḍa ɣef sin n yiḥricen. Taṣebḥit n wass tella-d tuffɣa ɣer yiwen n usudu d amaynut, anda i texdem asunẓu-s i wammas-a n usileɣ n yiselmaden imaynuten i irebbḥen deg temsizliyen n usegmi. Tga tuffɣa-nniḍen ɣer wiyeḍnin deg tama n El Ḥasi, anda i tfureṣ tagnit, tbedd s timmad-is ɣef lixṣaṣ i d-yettilin, i d-ttmagaren yixeddamen, terna temmeslay d yinemhalen n wammasen-a akken ad yili uwenneɛ n waddad n yixeddmaen-nsen. Ma d tameddit n wass-nni dima, yella-d unejmuɛ i tt-id-yessemlalen d yiqerra d yinemhalen n yiɣerbazen n tsuddest 2 n kraḍ n yiswiren, anda i temmeslay u tesla s lqreb i waddad d uswir ideg tella tama-a. Terna twelleh inemhalen-a ad ilin d assaɣ igerrzen i usiweḍ gar yiselmaden d yimawlan n yinelmaden, akked usebɣes n yiselmaden d usmeḥses i wuguren-nsen, acku ɛlaḥsab-is d anemhal i d aqerru amenzu deg uɣerbaz. I wakken ad yelḥu, ad iseggem uɣerbaz-a, yewwi-d fell-as ad isseḥres ɣef kra n temsal. Annect-a merra, yettuɣal-d i lfayda n uɣerbaz d usnerni n uswir n yinelmaden.
Ass n yibeddi sdat n tenmehliwin n usedwel
Tusa-d tirza-a n tneɣlaft yiwen n wass uqbel asunded uɣur i d-berrḥen inmula ilelliyen, akken ad d-yili uɛawed n umuqel n wuguren yeckunetḍen ɣef uɣerbaz azzayri acḥal d iseggasen-aya. Wid yerzan ama d iselmaden, ama d inedbalen. Ɣef waya i d-yella usunded ass-nni n arim qrib deg yakk tamiwin, imi yewweḍ ɣer 57% i d-nnan trebbuyaɛ n yinmula, ma d tinmehliwin n usedwel skadben aya, nnan-d ala 8% i d-yerran i tiɣri. Ma d ass n aram, yella-d yibeddi deg tenmehliwin , d akemmel i usunded, d acetki daɣen ɣef uwenneɛ n liḥala n yixeddamen. Deg Wehran, rzan-d s ṭṭaqa, azal n 200 n yixeddamen i ibedden, refden iberriḥen n usuter d tririt n wazal i uxeddam n uḥric n usegmi. Massa N. Benɣebriṭ, seg tama-s, ass-nni n tirza-ines ɣer waɣir n Wehran, temmeslay d tɣamsa, tenna d akken taɣlift tettwahegga ad teldi tiwwura n udiwenni i tifrat n wuguren-a. Maca inmula ugin adiwenni-a, imi ṭṭfen deg ṛṛay n uḥbas ɣef lxedma, acku ulac amaynut i d-yettawi umeslay, ma neẓra belli liḥala ur teqɛid ara. Ihi ɛlaḥsab-nsen, ilaq d asunded d leḥris ara yilin akken ad d-tesmeḥses teɣlift i yiɣeblan-nsen, ad d-awin izerfan-nsen. D ayen i tt-yeǧǧan ula d nettat ad terr s usenɣes deg tjerniḍin n wid yeṭṭfen deg usunded. Maca ayagi yezmer kan ad yesnerni, ad yesluɣ, u ad yessemɣer tilufa
Khaled Achoui