Zgan yakk yimḥaddiyen n twennaḍt deg umaḍal, ttalsen-d awal d akken taluft n uḥraz d useḥbiber ɣef ugama terza yal amdan seg tmetti. Dɣa, ayen i d-yeḍran ussan-a iɛeddan di teftist n Melbu, deg usamar n Bgayet, mi ttwaqelɛent syinna kra n ttjur, yegla-d s waṭas n wurrif d usḥissef ɣur yimezdaɣ n temnaḍt-a n Melbu d yilemẓiyen n umussu asdukklan. Gar-asen ihi, tiddukkla Awal Issawal i d-yewwten s terẓen deg wid i yellan deffir n tigawt-a, i nezmer ad nsemmi d tadyant takulujit, meskud aseklu seg yiferdisen igejdanen i iteṭṭfen deg uqeɛɛed n unagraw n ugama.
Dɣa, seg wayen i d-nnan yiɛeggalen n tddukkla-a, ilaq ɣef lmir d yinesdabuyen i teɛna taluft, ad d-sfehmen ssebba n tukksa seg ugerruj-a agaman. Wid yesseḥbibiren ɣef twennaḍt di tama-a n tɣiwant n Melbu, ssuturen ad yeḥbes akk uqlaɛ-a n tseḍwa i yellan meqrub taftist, akken yebɣu yili yiswi neɣ usenfar n lebni sɣur yimasayen. Akken i d-tewwi teɣbalut-nneɣ, mačči d ta i d tikkelt tamezwarut ara ttwaqelɛent ttjur si teftist-a n Melbu, rnu war ma iban-d ɣer taggara d anwa i d-yefkan tasunḍa i tigawt-nni. Am tikkelt yezrin, kra n wayyuren tura, mi ttwagezmen wazal n 15 n yisekla akken kan ad yettwabnu dinna uɣrab i yiwen n usenfar.
«Yal tikkelt ad d-asen ad gezmen, yal tikkelt acḥal ara gezmen, tawennaḍt-nneɣ tezga tenṭer. Ilaq ad neddukkel akken ur d-ttilint ara ɣer sdat tedyanin-a di teftist-nneɣ », i d-yenna yiwen n uɛeggal n tddukkla Awal Issawal. Yewwi-d ad d-nesmekti d akken, seg uqlaɛ-a n ttjur i d-yettilin seg tikkelt ɣer tayeḍ di Melbu, yeɣba ula d yiwen n umḍiq agaman i igerrzen, iwumi llan ssawalen « Tamda n Teɛricin ». Yella yettuneḥsab umkan-a seg temnaḍin ireḍben, ideg nuḥen ula d kra n yiɣersiwen n waman, maca tura yenger, yeggra-d d abiṭun.
M. K.