Yetturar uselmad nnuba tameqqṛant deg usegmi n tmetti s umata, imi, deffir usegmi n tyemmat, aselmad mačči kan d win i d-yessegzayen timsirin, lameεna d win ineǧǧṛen abrid n unelmad i yimal n lεali, daymi i as-fkan azal meqqṛen tmura n umaḍal. Ma yella di tmurt n Lezzayer, d anemgal, dɣa rran-t di rrif seg yal tama, ama seg tama n yizerfan, neɣ d tin n wazal. Ladɣa iselmaden n uswir amezwaru, imi d nutni i yesɣarayen, d nutni i d iεessasen n warrac, d iqeddacen n tneččit daɣen.
Rnu ɣer waya, ahil n useɣri-nsen i yeččuren nezzeh, rnu-t ɣer wakud i iḥeṛṣen akken ilaq fell-asen. Dɣa aselmad n uswir-a, yesεa ugar n 30 n yisragen i ddurt. Lḥif-a i ttidiren, yeṣṣuẓi fell-asen, d ayen i ten-yeǧǧan aseggas-a uran tabrat i uneɣlaf n usegmi, fuṛṣen akud n tnekra n ugdud, anda i as-ssutren ad iwali deg temsalt-nsen, ad asen-iεel ttawil. Seg wayen i ssutren yiselmaden-a, ad sεun izerfan mtawan akked wid n uɣerbaz alemmas, d wid n tesnawit. Aneɣlaf n usegmi, yerra-d i usiwel-nsen s uɣiwel, yefra-asen yiwen n uɣbel i llan yakan sεan-t, d azemz n yikayaden. Aredmani, d inelmaden n tesnawit, d wid uɣerbaz alemmas i ixeddmen ikayaden d imezwura, d nutni daɣen i iteffɣen imuṛaṣ uqbel.
Ma yella d aseggas-a, azemz n yikayaden d yiwen deg kṛaḍ n yiɣerbazen. Iselmaden n uɣerbaz amezwaru yehwa-asen waya, dɣa yenna-aɣ-d yiwen : « Ayagi yeffeɣ ɣef warrac, imi εyan mliḥ seg wahil yeččuṛen, yuɣal uqcic ur iteṭṭef ara, neɣ s unamek-nniḍen ẓẓay i tegzi. Ma yella seg tama-nneɣ, ula d nekni nuklal asteεfu seld aseggas n uxeddim iweεṛen ».
K. K.