Accueil Tamazight Ussan n usileɣ i yiselmaden imunan

Aselmed n tmaziɣt deg Ɛin Timucent

Ussan n usileɣ i yiselmaden imunan

143

Deg yimuras-a n ukraḍyur wis sin n tefsut i ttkemmilen wussan n usileɣ i yiselmaden imunan n tmaziɣt. Bdan yiselmaden-a aselmed ilindi, mbeɛd mi rebḥen deg temsizzelt-nni n yiselmaden i d-yellan deg unebdu n 2018.

D Ammas n Usuddu aɣelnaw n usileɣ asensegman n yiselmaden (I.N.F.P.E) deg twilayt n Ɛin Timucent i yettwafernen akken ad ikemmel usileɣ-a i yiselmaden imaynuten seld mi ssezrin yakan aḥric-nni amenzu deg wayyur n yulyu 2018 i wazal n 20 n wussan deg temnaḍt-a yakan. Syin deg yimuras n 15 n wussan n tegrest, yeɛni deg wayyur n duǧember iɛeddan, ikemmel uḥric wis sin n usileɣ deg twilayt n Bumerdas. Ma d aḥric wis kraḍ u d aneggaru, yebda seg 24 meɣres ad ikemmel ɣef teɣzi n yimuras-a. Ha-t-a-n yettili-d deg snat-a n tamiwin. Ttwabḍan yiselmaden ɛlaḥsab n temnaḍin n uxeddim; Iselmaden yesɣarayen deg umalu n tmurt, ttkemmilen tannant-a-nsen akken i d-nezwar deg-s deg Tama n Tuccent, deg wazal n 45 yid-sen, s lmendad n sin imaswaḍen. Ma d wid yettmahilen deg tlemmast n tmurt, tamanaɣt d twilayin i as-d-yezzin, a-ten-a deg Bumerdas. Ar taggara n usileɣ-a, ad d-ilin yikayaden ara d-yettwaheggin sɣur imaswaḍen n teɣlift n usedwel, aya akken ad ẓren ma iselmaden ssawḍen ɣer uswir iwatan, u gzan akken ilaq timsirin d yiṣenfaren d tarrayin n uselmed i asen-yettunefken ɣef teɣzi n useggas-a, d uzmar n usiweḍ n yizen akken ilaq i unelmad deg tneɣrit.

Gar yiswan n usileɣ-a, ad yili lettkal fell-asen, imi ttuneḥsaben d igensasen n tmaziɣt berra i tmurt n Leqbayel. Ad ssiwḍen ad cebbḥen tamaziɣt, u ad tt-sḥemlen i wid ur tt-nettmeslay ara. Dɣa nezmer ad d-nini imir ssawḍen s iswi, acku d wa i d iswi amenzu n uselmed n tmaziɣt deg temnaḍin timseɛrabin. Ad d-nesmekti belli ar tura, llan nnig n 100 n yiselmaden n tmaziɣt berra n tmurt n Leqbayel deg umalu n tmurt kan, segmi bdan ttaken-d idgan n uselmed n tutlayt n Dda Lmulud seg useggas n 2014-2015 d tasawent. Amedya deg Timucent kan, llan 30 n yiselmaden, aseggas-a i bdan. War ma nebder-d amḍan yellan deg usamar d unẓul n tmurt.

Segmi teṭṭef tanmehla n usedwel, tessebgen-d lebɣi meqqren ɣer wayen yakk ilan assaɣ s lqerb neɣ s lbeɛd s aɣerbaz, akken ad yali uswir, ad yelḥu usensegmi s yakk iḥricen-is. Txeddem tirza ɣer unnar akken ad tẓer s anda yessaweḍ uswir d wanda yettili lixṣaṣ akken ad yettuṣeggem.

Lebɣi n Massa Abid, tanemhalt n usedwel

Yerna tessebgan-d lebɣi-s ɣer tmaziɣ. Ma d tamentilt ahat i ten-yeǧǧan ad fernen tawilayt-a n Timucent d ammas n usileɣ n yiselmaden n tmaziɣt, d lebɣi-a i tesɛa tnemhalt-a, Massa Abid.Z i d-yusan seg Bgayet, acku yal tikkelt tessebgan-d leḥmala-ines i wayen akk i icudden ɣer tmaziɣt d yidles-is, ladɣa ma nebder-d aselmed n tutlayt-a, imi d nettat yakan i yessutren akken ad d-fken annect-a n yimukan i temnaḍt-a. Tbedd ɣer tama n yiselmaden, u yal tikkelt trezzu fell-asen ɣer yiɣerbazen.

Nnan-d ɣef tannant

Nesteqsa yiwet n tselmadt ɣef tannant-a, d wamek i tettɛedday, tenna-d “D tirmit igerrzen, aṭas n wayen i d-nugem seg wasmi i nebda, acku yettili leqdic d usileɣ s yigrawen, d annect-a i aɣ-iɛawnen, yal wa acu n umaynut ara d-yernu, dɣa ar taggara d nekkni s yiselmaden ara d-yesfaydin, akken ara nessemres tarrayin-a deg tneɣriyin syin akkin”. “Rnu ɣef waya, d tagmat i d-yettilin gar yiselmaden zun d atmaten, annect-a ad ɣ-d-yefk lǧehd akken ad nkemmel amahil s lebɣi” i d-yerna wayeḍ. Ma d Abdellah Arkoub, d amaswaḍ n temnaḍt n Tizi Uzzu, yenna-d: “Netteɛraḍ ad asen-nefk bla cceḥḥa tirmit yakk i nekseb segmi nekcem s annar n uselmed, akken iselmaden-a yellan ass-a d imunan, azekka deg-sen ara d-ffɣen wid ara ikemmlen abrid i tebda tettaɣ-it tmaziɣt deg taɣult n uselmed”.

Khaled Achoui