(Nouvelle Application en Tamazight sur Androïd: Dictionnaire Tamazight-Français-Tamazight)
S tumert meqqren tuddsa Tawalt (www.tawalt.com) akked tasbeddit Tiregwa (www.tamazgha.ca) id heggan ger yifassen-nwen, yerna baṭṭel, ahil asenselkim amenzu, neɣ asnas (application) Androïd, d tunṭict n yiwen umawal amaziɣ deg tilifun-nwen n ufus.
Asnas-a igerrzen, zemren ad ad as-ččen nnfeɛ ama imezɣawalen neɣ wid i iran ad lemden tutlayt tamaziɣt. Nga-t-id i kunwi anda deg-s ugar n 35000 n wawalen n tmaziɣt akken yinumak-nsen s tefṛansist, d awalen i d-nelqeḍ seg yimawalen i nesexdam aṭas am umawal n Dda Lmulud At Mɛemmeṛ, amawal n Jean-Marie Dallet, amawal ameɣradan n A. Idris akked R. Madi, Ccix-iw, atg. Agrudem-is (interface) ifulkin ad ken-yeǧǧ ad tmerḥem deg tutlayt ɣer tayeḍ s shala, akken diɣen i tzemrem ad tfernem isekkilen n tmaziɣt i tebɣam ad ten-sqedcem ama d Tifinɣ neɣ d asekkil alatini. Yenra ɣur-wen ttawil akken ad d-nadim awal iɣef tettḥufum neɣ ad t-bḍum akked yemddukal-nwen deg uzeṭṭa n tmetti deg Internet am Skype, Facebook, atg. D ayen ara ken-yeǧǧen ad tesnernim tamawalt-nwen deg tmaziɣt ad tuɣal d tamerkantit. Ad tafem diɣen ttawil am rnu ɣer tḥawact-ik akked d wefran n tsefsa (police) n tifinaɣ i ken-iɛeǧben d usemɣer n tiddi-nsent akken ad tent-ferẓem akken ilaq.
Ad d-nesmekti d akken asnan-a d tawaffɣa-s tamenzut kan, ad d-ḍefren wudmawen nniḍen igerrzen ugar deg wussan i d-iteddun. Yerna seg tura yakan ara nxeddem akken ad t-nesnefli i tmacinin nniḍen am iPhone akked uselkim. Ihi, nettkel fell-awen akken ad aɣ-d-aznem iwenniten d yisumar-nwen (suggestion) akken ad as-nwenneɛ ugar i wudmawen i d-iteddun.
Yeqqim-awen-d kan ad tzedmem asnas-a deg uzeṭṭa n Internet, yerna baṭṭel. Seg tama nniḍen, nettkel diɣen fell-awen ad tefkem afus s tedrimt akken ad tifsus fell-aɣ teɛkkemt i wahilen isenselkimen ara nesbedd i tmaziɣt deg wugguren i d-iteddun. Gret tamawt d akken anazur umezgun ameqqran Slimane Benaissa yefka-d afus n tallelt ilmend n tutlayt Tamaziɣt i as illan deg ul acku yurar-d deg yiwen udellel deg youtube i waken ad yettwasen ugar umawal-a deg Android. Annect-a tzemrem ad twalim deg wesmel n Tawalt neɣ win n Tiregwa i d-nefka deg tazwara umagrad-a.
At bucnan