Yerza-d umaswaḍ n tmaziɣt Mass Arkoub Abdellah deg wahil n leqdic-is n usenṣeb n yiselmaden ɣer twilayt n Wehran. Yella usenṣeb n kraḍ n tselmadin deg wahil-is. Ttwaneṣbent ussan n acer, arim d ahad yezrin. Ɛeddant temsirin akken iwata, ama d asenked-nsent sɣur iselmaden, ama d tikkin n yinelmaden d lebɣi-nsen ɣer ulmad n tmaziɣt, ɣef wakken i t-id-iwekked Mass Arkoub. Aneggaru-a, ifureṣ tagnit n tirza-a, dɣa iga-d timlilit n usileɣ tasensegmant i yiselmaden yettmahilen deg temnaḍt-a n Wehran, ass n aram deg wammas n Ben Achenhou, anida i d-yella usentel agejdan n temlilit ɣef “Wamek ara neg tamsirt n usenfali d ufares s timawit” akked yinelmaden. Ayɣer i yefren asentel-a ?
Acku yesɛa tixutert i wid ur nettmeslay ara taqbaylit, imi d ameslay i d llsas swayes ilaq ad bdun yinelmaden n tamiwin-a, imi tuget-nsen d imseɛraben, ur fehhmen ara tamaziɣt, ula d inelmaden iqbayliyen i d-yettenkaren din, tuɛer-asen tmeslayt, ɣef waya ilaq ad xedmen yid-sen yiselmaden ɣef tmesliwt d ususru, akken ara ɛeddin ɣer tarrayin-nniḍen am tira, tajerrumt d tseftit. Yella-d daɣen umeslay s umata ɣef umgired n uselmed gar temnaḍin-a tiɛerbawalin d temnaḍin n tmurt n Leqbayel. Akken daɣen i d-ssenfalin yiselmaden ɣef wuguren i ttemlilin yal ass, ama sɣur kra n yinemhalen, ama sɣur Tanmehla n usedwel, ɣef wannect-a, iga umaswaḍ aneqqis ara iceyyeɛ ɣer Teɣlift n usegmi.
Tlul-d teseqqamut tasensegmant
Mass Abdellah Arkoub, ifureṣ tagnit-a n temlilit n yiselmaden akken ad d-yeslal taseqqamut tasensegmant s lmendad n sin n yiselmaden ara yilin i lmendad n yimidawen-nsen deg temliliyin ara xeddmen yal aggur, akken xeddmen yiselmaden n tefransist d wid n taɛrabt. Akken daɣen i tella ɣur yiselmaden n tmaziɣt yettmahilen deg tmurt n Leqbayel. Ad sqerdcen tamsirt ara d-yessenked yiwen seg yiselmaden u ad d-ffɣen s tsemlilt ar taggara. Dɣa timlilit tamezwarut ad tili taggara n waggur n yennayer, tis snat taggara n furar, ma d tis kraḍet di tlemmast n yebrir.
Dɣa deg umeslay n Mass Arkoub yenna-d: “Ay akken bɣunt mgaradent tiktiwin, iswi aneggaru yezdin iselmaden d yiwen, d aselmed d useḥmel d ucebbeḥ n tutlayt n tmaziɣt i yinelmaden iɛerbawalen”. Ɣas di tlemmast n wuguren, acku ɛlaḥsab-is “Akka ay tebda taggayt tamezwarut n yiselmaden deg useggas n 1995, ulac tin ur ten-nezgil akken ad ǧǧen aselmed n tutlayt-a, maca s ṣṣber-nsen, ass-a meqqret lɣella”. “D abrid-a i ilaq ad teḍfer tsuta tamaynut n yiselmaden akken ad d-yettwabeggen wudem aḥeqqani n umezruy n Lezzayer. Annect-a yettili-d s umahil igerrzen d uselmed s wul sɣur iselmaden di tneɣriyin”, ikemmel Mass Arkoub deg wawal-is.
Khaled Achoui