Tiɣri n tddukkla Tiɣra

Partager

Tesɛa azal meqqren tddukkla tiɣṛa n Tquṛṛabt deg temnaḍt n At Ɛebbas s umata s leqdic-is ifazzen, i dttheggin yimeltaɣen-is, s ufus n tallelt n uselwaynsen. Ccil s dṛus, tessaweḍ tddukkla-a i wakken texdem deg wakud amecṭuḥ, ayen ur xdiment tiyaḍ deg yiseggasen. Ladɣa deg wayen yeεnan leqdic adelsan, d usegmu n tegzi n warrac imecṭaḥ. D ayen i ten-yeǧǧan fkan-as azal i udlis, d tɣuṛi. Imi rnu ɣer leqdic n (iḍ n teqṣiḍt), i d-heggan i warrac-nsen deg unebdu yezrin, anida i tettunefk tegnit i warrac i wakken ad issinen aṭaṣ n teqṣiḍin, ladɣa tid n zik. Aseggas-a, thegga-d tddukkla Tiɣṛa aṣenfaṛ n tɣuṛi d amaynut i ubaɣuṛ n lwacul n temnaḍt-nsen.

Aneggaru-a, d aselmed n tɣuṛi n yidlisen i yiqṛuṛen seg temẓi, deg wakud ilelli-nsen, acku, d ayen ara ten-inefεen mliḥ deg yimal-nsen. Daymi i d-gren tiɣṛi i yimezdaɣ n Tqeṛṛabt d At Ɛebbas s umata, bac ad ten-εiwnen deg usenfaṛ n tledayt n temkeṛḍit deg taddart n Tkeṛṛabt. Γef usentel-a, tenna-aɣ-d yiwent n tmeltaɣt : « Niqal tikti-a tella deg wahil-nneɣ seg wacḥal-aya, lameεna ur neksib ara ttawilat i wakken ad tt-nexdem. Ihi ass-a, i ubaɣuṛ n warracnneɣ, neḥwaǧ afus n tallelt i wakken ad tesmurres tikti-a ». Ad dnesmekti belli, tamkeṛḍit-a, ad teldi tiwwura-s i yimezdaɣ akken ma llan.

Ama d amecṭuḥ, neɣ d ameqqṛan. Rnu i waya, imḍebbṛen n tddukkla-a, gren-d tiɣṛi i yimezdaɣ bac ad rzun ɣer tzeqqa n yinejmuεen-nsen, i wakken ad d-mudden ṛṛay d tektiwin-nsen. Ma yella ɣef umuɣ n wayen iwumi sran, ilaq-asen ṭṭwabel, ikersiyen, iselkimen, tixzanin anda ara gren idlisen, aẓeṭṭa Internet, d waṭaṣ n tɣawsiwin-nniḍen. Ihi i kra n win yebɣan ad itekki deg lebni n yimal n warrac, ad yissiwel ɣer uṭṭun-nsen 07 70 56 14 15.

K. K.

Partager