Tettwaḥsab tɣiwant n Arzew i d-yezgan deg tama n umalu n Wehran, i ibeɛden fell-as s 50 n KM, d yiwet n tɣiwant yesɛan azal d lmizan deg twilayt-a n Wehran, ma neẓra belli d taɣiwant timerrit seg tama, imi ɣur-s ilel d usagen. Ma seg tama-nniḍen, tettuneḥsab d tamnaḍt n temguri, ma neẓra acḥal n yidgan i as-d-yezzin s tkebbunay n lpitrul i d-yessekcamen aṭas n tedrimt. Maca, ma nmuqel udem amatu n tɣiwant-a d umhaz-ines deg waṭas n taɣulin, ad t-naf ur igerrez ara, acku aṭas n lixṣaṣ i yellan deg unnar. Ad nebder-d kan imekwan izuyaz n usteɛfu i yimdanen. Ɣef usentel-a dɣa, yenna uselway n tɣiwant i tɣamsa deg wawal-is deg yimalas-a belli «Yettili-d lixsas deg waṭas n taɣulin, d ayen i yeǧǧan taɣiwant meqqren am Arzew s tkebbunay i tesɛa, ur teggar ara aḍar deg tenfalit n yiḥricen idamsanen d wid n umahil». Ɣef waya i d-iberreḥ s lehhu n ssrabes n umahil izuyaz n tɣiwant-is s usenfar n lxedma n xemsa yidgan n timerrit, ladɣa deg tamiwin i d-yezgan rrif n yilel, d imekwan ara d-yeglun s yimdanen, ideg zemrent ad ttemsegrawent u ad steɛfunt twaculin s tlelli, imi daɣen drus i d-yeqqimen akken ad tekcem tsemhuyt n unebdu, i d-ijebbden iḥewwasen ɣer temnaḍin yesɛan lebḥer. Imukun-a i yetturaǧun ad yebdu deg-sen umahil, d wid yellan deg ubrid n lkurnic. Am waken, ad d-yili umraḥ-nniḍen d awesɛan deg temnaḍt iwumi qqaren Aɣbalu El Ɣezlan, sin-nniḍen deg Cap Carbon. Imukan-a ihi, ad ilin d tanila i wid i d-iqesḍen tamdint-a n Arzew deg unebdu, ad afen anda ara sɛeddin akud, deg tlemmast n listeɛ irbiɛiyen. Xir ma gran-d yidgan-a gar yifassen n kra seg wid ur nesɛi ara ccɣel, ad ten-rren d imekwan n tissit d umennuɣ, i d-igellun ala s timḍerrit i yessenqasen deg wazal n tɣiwant-a tapitrulit. Ma d tadrimt ara yettwaxessen i usenfar-a, yenna uselway n tɣiwant ɣer taggara : «Ad d-sɣimen yimekwan-a imerriyen azal n 770 n yimelyan, ad ttwabḍun ɣef sin n yiḥricen, aḥric amenzu ad yečč qrib 450 n yimelyan, ma d aḥric wis sin ad yaweḍ ɣer wazal n 390 imelyan».
K. A.