“Leḥder yugar leqḍeɛ”. D inzi-a n at zik i d-yeggran ad t-sxedmen yimdanen, akken ad ḥadren iman-nsen mgal aṭṭan amihan covid-19, i d-yeččan amaḍal ussan-a. Imi urɛad i as-d-ufan yimussnawen d yimnadiyen n tujjya asafar n uḥbas-ines. Anfafad n Corona, yebda-d taggara n waggur n duǧember 2019, deg tmurt n Ccinwa, syin yeḥrured ɣer tmura-nniḍen, armi yelseq ass-a deg 113 n tmura, ɣef leḥsab i d-tmud tuddsa tamaḍlant n tdawsa. Dɣa iberreḥ-d unemhal amatu n Tuddsa ass-nni n amhad s uṣennef n waṭṭan-agi d aṭṭan amaḍlan amihan, ma nwala simmal yettnernay, qrib ad yaɣ akk amaḍal. Yewwi-d ɣef tmura ad ḥerzent s uḥader iwulmen, ma d imdanen ad ḍefren tarrayin ilaqen n usizdeg .
Kra n yimḍanen
Ar tura, banent-d deg umaḍal azal n 124 101 n liḥalat, yenɣa 4 566 n yimdanen. D tamurt n Ccinwa ideg i d-yebda i yeṭṭef s waṭas, s 80 787 liḥalat, mmuten 3 151, jjin 61 475. Deg Lurup, ufan-d 22 307 liḥalat, mmuten gar-asen 930 d amdan. D tamurt n Ṭṭelyan i yenṭerren s waṭas mbeɛd Ccinwa, s 12 462 liḥalat, mmuten gar-asen 827 yimuḍan. Syin d tamurt n Iran, s 9 000 imuḍan, mmuten 354 deg-sen. Teṭṭafar-itt-id Kurya n wadda, s 7 577 liḥalat d 60 n yimettanen. Tamurt n Lispan, s 2 128 liḥalat d 47 n yimettanen. Timura n Albanie, Suède, Irlande, Belgique, Panama d Bulgarie, banent-d liḥalat timezwura n wid yemmuten taggara n ddurt-agi kan.
Ma d timura n Hundoras, Boulivie, Côte d’ivoire d Turquie, banent-d liḥalat n waṭṭan timezwura. Deg tmurt n Fransa, yuli umḍan n wid yemmuten ɣer 48, gar 2 281 n wid yeṭṭef unfafad n covid-19. Deg Lezzayer, ar wass n amhad, 26 n yimdanen i yekcem waṭṭan, 2 n yirgazen i yemmuten. Ɣef waya i d-yettili leḥder meqqren s umdal n yiɣerbazen d tesdawiyin, inurar n ddabex, d yidgan ideg d-ttemlilin s waṭas yimdanen. Deg Tizi Uzzu, ar yiḍelli, banen-d 3 n yimuḍan i t-ihelken. Ha-ten-in deg sbiter CHU Nedir Med n temdint-a.
Kh. A.