Iberreḥ-d ass-nni n lḥed di Lezzayer tamaneɣt, uneɣlaf n Usegmi aɣelnaw, Abdelhakim Belabed belli atug n urbaḥ deg ukayad n n taggara n ulmud n uɣerbaz amenzu yewweḍ ɣer 83,31%, deg wakal n tmurt. Yerna yenna-d, agemmuḍ-agi, d ayen yettwaqbalen.
Deg yiwen n usarag n tɣamsa, i iga i lmend n beddu n yikayaden n Lbak, isegza-d uneɣlaf belli agemmuḍ-agi yewweḍ ɣer 94,90% deg 48 n lwilayat, mi ara d-nseddu atug n uɛeddi (atug n rrbeḥ deg yikayaden rnu-as talemmast n uktazal imezgi). Ad nesmekti kan belli 812.655 n yinelmaden i yeqqaren deg 18 000 n yiɣerbazen imenza yellan di tmurt. Ddeqs daɣen n yiɣerbazen i d-yewwin agemmuḍ n 100%.
Tizi Uzzu deg umḍiq amezwaru i tikkelt tis 11
Ass-nni n lḥed yezrin (16 yunyu), mi i d-banen yigemmaḍ n ukayad n taggara n uswir amenzu (5e) n useggas aɣurbiz 2018-2019, yeḍḥa-d belli d lwilaya n Tizi Uzzu i d-yufraren i tikkelt tis 11, ta deffir ta.
Imi seg useggas n 2008, d nettat i yettaṭṭafen taqacut n umyezwar deg yigemmaḍ n tlata n yikayaden n taggara n useggas, gar-asen akayad-agi n 5e. Deg wayen yerzan igemmaḍ n lwilaya n Tizi Uzzu, Ɛlaḥsab n unemhal n usegmi-ines, azal n 17 865 i ijerden iman-nsen deg umuɣen n usεeddi n ukayad-a, yerna sεeddan-t akk. Leḥsab n wid i t-id-yewwin yelḥaq 16 879, s lqidar n 91, 11%, ma yella s wid iɛeddan s asuffeɣ (passage) yewweḍ ɣer 96,64%.
Azal n 222 n yiɣerbazen imenza, ɣef 624 n yiɣerbazen, i d-iḥellan 100% deg ukayad-agi, s lqidar n 35,56%. Azal daɣen n 30 n yinelmaden i d-yewwin tazmilt n 10/10 deg ukayad-agi, ma 24 n yinelmaden i d-yewwin tazmilt n 9,9 d wugar n 851 n yimsizewren sɛan ugar n 9,5.
Ma deg umyezwar n lwilayt deg yigemmaḍ n ukayad-agi, i tikkelt tis 11 d lwilaya n Tizi Uzzu, i d-yettifriren deg umḍiq amezwaru. Ad d-nesmekti kan, belli inelmaden-agi i yesɛan tazmilt n 5/10 neɣ ugar neɣ wid iɛeddan s usuffeɣ ad ruḥen deg wussan-agi ad jerden iman-nsen deg useggas amezwaru deg uɣerbaz alemmas. Ma deg wayen yerzan igemmaḍ n ukayad n BEM, yetturaǧu ad bannen ass, 01 yulyu 2019, ma d wid n BAC ad ilin ass n, 20 yulyu i d-iteddun.
Adaoun Abdelghani