Par DDK | 20 Aout 2018 | 766 lecture(s)

BGAYET - Axxam n yidles Ṭawes Amruc

Timsikent n teklut n unaẓur Zizu Amaziɣ

Ass-nni n larebɛa yezrin, 15 ɣuct 2018, tekfa temsikent n teklut n unaẓur Zizu Amaziɣ, i d-yellan deg Uxxam n yidles Ṭawes Amruc n Bgayet. D leqdic, i d-yellan ɣef teɣzi n 09 n wussan, imi tebda temsikent-a s wudem unṣib ass-nni n ttlata 07 deg ɣuct 2018, ɣef 14h00, tessuli ass-nni n larebɛa iεeddan 15 deg waggur-agi ideg nella. D tagnit ideg ifuṛes unaẓur n teklut Mass “Zizu Amaziɣ”, i wakken ad d-isenεet ayen akk yexdem deg ddeqs n yiseggasen-agi iεeddan, yerna yemlal d wid iḥemmlen tawsit-agi n tẓuri iwumi qqaren taklut. Isenεet-d ugar n 20 n tfelwiyin n ssbiɣa i icebḥen s waṭas, i icudden ɣer usentel n temsikent-agi “Gar tayri akked leḥyuf”, iɣef iḥemmel ad isuneɣ s waṭas. Ma ɣef tegnatin ideg tɛedda temsikent-agi, yenna-d: “Tikkelt-agi xtareɣ tamdint n Bgayet, i wakken ad xedmeɣ timsikent-iw n teklut, i iɛeddan deg tegnatin igerrzen. D tagnit ideg mlaleɣ d wid akk i yi-ḥemmlen d wid iran akk ayen xeddmeɣ. Ferḥeɣ aṭas s tirza n ucennay-nneɣ ameqqran Ṭakfarinas.” Ɣer taggara, ad d-nesmekti s tmeddurt n umsiken-agi Zizu Amaziɣ, yettwassnen aṭas n s yisem-agi n tẓuri, ma d isem-is aḥeqqani d Samir Belamin. D ilemẓi n 26 n yiseggasen, d taɣiwant n Ɛin Lḥemmam i t-id-yurwen. D imsuneɣ, d amedyaz daɣen rnu ɣer teklut i iḥemmel aṭas. Aṭas n temsikniyin n teklut i yexdem deg Tizi Uzzu, tura yezzi ɣer lwilaya n Bgayet.
Souhila Yamani

0