-Ttxil-m a lexliqa ma ur yi-d-tenniḍ amek armi d-tleḥqeḍ γer da ?
Tin terra-yas-d :Waqila kemm yeqquṛ uqeṛṛuy-im ! Yak nniγ-am-d yakan :
Nekk d lalla-m Faṭima
Aẓaṛ-inu n ccurafa
Usiγ-d seg tmurt n ccerq
Wwiγ-d yid-i timucuha
N alef layla w layla
D yisefra n Lfarezdeq
I Muḥend yesεan nniya
Yak ur yuhwan ara
Akken ad yeqqim yeεweq
Dasin nnernant deg-s tismin, mi as-tesla akka tenṭeq ula d nettat s usefru :
Wa d Muḥend-inu
S yes-i i yettaru
Ma ulac-iyi netta ur yelli
Agdud-is deg-s yetṛaju
S yes-s kan i yettargu
Ma yefna teγli-d tili.
Teqqel daγen tluεa-tt Dasin :
– Meεna ur yi-d-tǧawbeḍ ara εad γef usteqsi-inu ?
-Γef acu ?
-Amek armi i d-teffγeḍ seg yixef n ubriq kemm yellan anect n ugejdur ?
-Xemsa fi εeyni-k !
-A wah ! D lmuḥal ad amneγ γas ulamma d ayen i ẓṛiγ s wallen-iw ! Wissen kan amek i aγ-tdewxeḍ, wama da gar-aneγ i telliḍ teffreḍ ; tebγiḍ umbeεεed ad tessaliḍ di ccan-im, ataya tesεiḍ lbeṛhan. Faqu ! Ur kem-numin ara, la nekk la Muḥend.
Faṭima tenneḥcam, tuγal d tazeggaγt, tenna-yas : Welleh ar deg ubriq ihin ideg ttidireγ i wazal n rbeεṭac n leqṛun aya. Welleh ar syin i d-ffγeγ.
-Tamseεṛeqt-agi-inem telha ! Yenna-yas : « Yuker ḥedṛe&gamma,; yeggul umneγ ». Aha ṭṛa sbeggen-aγ-d amek akka i d-teffγeḍ seg yixef n ubriq yellan anect n uḍaḍ-im ?
-Amek ara m-d-sbegneγ ?
-Uγal γer daxel-is akka neṭallay !
* D tullist i yura Mokrane Chikhi, tewwi araz amezwaru
di temzizelt n tsekla « Boujie d’or » n useggas 2010