Asqamu Unnig n Timmuzɣa yessudes-d di ctember 2010 yiwet n temlilit tagraɣlant n tlata n wussan di temdint n Boumerdès anda i d-yella wawal ɣef yilugan n tira. Dɣa d tagnit ideg ttgezmen di rray isdawiyen d yimaswaḍen i iḥeḍren dinna ɣef usekkil alaṭini ara yettwasqedcen i tira n tmaziɣt. Ɣer tama n waya, wid yesseqdacen tutlayt n Mɛemri sqerdcen s telqayt tamsalt n yilugan n tira. Ɣef teɣzi n tlata n wussan ihi, ulac ayen ur nɛeddi ara deg uɣerbal almi imeddukkal n Allaoua Rabehi d Said Chemakh ssawḍen ad d-gemren tiktiwin n wid iḥeḍren iwakken ad ttujerdent deg yiwet n tektabt ara yilin deg ussan-a i d-iteddun gar yifassen n yiselmaden n tmaziɣt. Imi d yiwen n uḥric s wazal-is deg uselmed, Asqamu Unnig n Timmuzɣa iwala dakken nnig n yilugan n tira iwulem ad d-yili leqdic ɣef uselmed n tjerrumt. Ihi, yessewjed-d yiwet n temlilit, tikkelt-a d taɣelnawt, deg temdint n Zéralda ɣef teɣzi n tlata n wussan seg 17 alamma d 19 seg waggur n tuber ideg i nella. Ahil i d-yettwaheggan d amerkanti, imi nnig n 10 n yisaragen ideg ara d-yili wawal ɣef tjerrumt, azal-is deg tutlayt d tarrayt iwulmen i uselmed-ines.
Aṭas n yisdawiyen d yimnuda deg uḥric-a ɣer tama n yimaswaḍen n tutlayt-a ara yilin d inebgawen n HCA. D tagnit daɣ anda ara sersen lsas ireṣṣan i uselmed n tmaziɣt. Ulamma llan akka yidlisen n tmaziɣt gar yifassen n yinelmaden ideg llant temsirin n tjerrumt, maca tamuɣli s telqayt deg uḥric-a teḍḥa-d tlaq, yerna s lɛejlan.
Limer ad nezzi kan cwiṭ ɣer deffir, iselmaden n tmaziɣt sɛan yiwen n wallal n tjerrumt i d-yeǧǧa Dda Lmulud. S tidet, injer-d abrid i tutlayt, maca ur yezmir ara udlis-a ad yili di lmendad i yinelmaden. Ḍrant-d akka tezrawin am tid n Kamel Nait Zerrad, yerzan tajerrumt. Ass-a, ma nebɣa ad naweḍ ɣer yiswi n usewseɛ n uselmed n tmaziɣt ɣer temnaḍin n tmurt imeṛṛa ilaq ad yili uqeɛɛed deg wahilen labeɛda tajerrumt. Nezmer kan ad d-nini timlilit ara d-yilin akka d tin ara d-yefken afud d lǧehd i tmaziɣt. Am wakken daɣ ara tesɛu yiwen n wudem yettuqadaren imi d axeddim iɣef ara d-yili umwata n yimassanen d yimnuda deg uḥric-a.
Sylia. M