Ttalsen-aɣ-d yimezwura dakken uqbel mi ara d-taweḍ tegrest imezdaɣ n tudrin ttheggin-as akken iwata. Awren d tazer s ikufan, zzit deg yicbula, ula d lmal ttafen-as-d ttawil s wayen ara yidir. Ɣas akken ur sɛin ayen ara asen-d-yessiwḍen isallen n liḥala n tegnawt d wacḥal ara yewwet udfel, maca ur ttamnen tignewt n tegrest, ttheggin usu uqbel naddam. I yebɣu yekk udfel, imdanen ttqabalen-t !
Tura, imi tamusni tennerna, ttawilat ara d-yessiwḍen isallen ṭṭuqten, ɣlin yimdanen di tfexxet. Amek ihi ur iwehhem ara umdan ara iwalin azzayri yewqeɛ di tcebbakt n udfel, ur yesɛi lgaz wala ayefki ! Ama d rradyu, d iɣmisen neɣ ahat d tiliẓri, ssawalen-d ɣef uhaǧuǧ n usemmiḍ d udfel a d-yawḍen, acemma ur yettwahegga, almi yeḥsel uxlul di lɣiḍa.
D tagnit ahat i mennan wid yettmeyyizen iwakken ad d-iban s wudem aḥeqqani aswir n wid yessedduyen timsal. Tidet kan, am wakken i qqaren at zik : ad d-banen wid n udfel.
D lɛib kan imi deg useggas n 2012, nuɣal ɣer liḥala iɣef yecna Lwennas ad t-yerḥem Rebbi :
Mazal nettemberraz ɣef tqerɛet n lgaz Am wakken acemma ur yeḍri
Taluft, tessebgen-d leɛyub ! Amek ihi, ttemyewwaten yirgazen ɣef lgaz. Wiyaḍ ttadden iḍ merra sdat lluzinat n lgaz, ama di Ccerfa neɣ di Sidi Xaled, iwakken ad d-awin snat n teqreɛtin kan. Yekker wah ruḥu di tudrin, lmir yuɣal d lɣerḍ i lɣaci.
Gar-aneɣ kan, acu i kesben wigi i nefren ɣer tɣiwant iwakken ad aɣ-kksen lḥif ? ur ksiben ttawilat, wala tadrimt iwakken ad alin di lmendad i yimezdaɣ n tɣiwanin i ssedduyen. D acu kan, ɣas s lixsas d lḥif, llan gar-asen wid ibedden ɣer yidis n yimezdaɣ, ssawḍen-asen-d ahat cwiṭ n lgaz.
Wamma, rray d tedrimt ttilin ɣer wid ur nettwali, d nutni i izemren ad ssuzfen fell-aɣ lḥif, ad ssiwḍen iqadusen n lgaz ɣer tudrin, ad yekfu ubibbi d uduḥḥu ɣef yimdanen.
D acu kan, yal wa acu i t-iceɣben. Amsedrar yettnadi ad yessiẓen, ad yeddari, di lawan anda wiyaḍ yunag ttxamim-nsen ɣer uqacuc, d waniwa ara yettrebbaɛen din.
S. M