Akka i tt-bɣan iɛeggalen n tfaska n tmedyazt Adrar n Fad ara d-yilin, i tikelt tis ɛecra , deg wat Smaɛil, di Bgayet, deg ussan n 22 alma d 25 meɣres 2012. Aseggas-agi d tamxaleft imi ad d-tili ddaw leɛnaya n terbaɛt n Abranis, tarbaɛt yessawḍen ccna n teqbaylit, s tmedyazt at zik, akin i tlisa n Lezzayer. Akka ara d-yili waṭas n leqdic beddema : d timzizzelt n isefra, d isaragen n at tseddawit, n imedyazen d imusnawen ɣef tmedyazt tamaziɣt d umennuɣ n Imaziɣen, d yiwet n tmeɣra meqqren n tarbaɛt Abranis di tagara n tfaska. Yal tikelt tadukla n wedrar n Fad ssemlalayen-d imedyazen seg waṭas n tamiwin n tmurt, ɛerrḍen ad d-jemɛen tantaliyin n tmaziɣt s yiles nnsen : tazennatit n Timimun, tarifit n Lmarruk, Tacawit, tacenwit, tumzabt d tmacaɣt d merra tantaliyin yellan di Lezzayer. Ḍemɛen sya ɣer zdat ad sduklen imedyazen nniḍen ama d ikaṭalaniyen ama d at tegzirin tiknariyin neɣ d Imaziɣen nniḍen. Am yal tafaska, d at tseddawit, ara d-yilin i lmendad : Kamel Buɛmara, Meḥruc Muḥend Uḥsen, Zahir Meksem, Allawa Rabḥi d wiyaḍ nniḍen. Afran n isefra iwennɛen ad d-yili ɛlaḥsab n wakken ara t-id-yawi bab-is neɣ yall-is, amek ara t-id-awin, tira-s, ma wwin-d ajdid di temsal ɣef ssefrayen neɣ ala, ccbaḥ n usefru d tugniwin ssexdamen, artg. Tessaram tdukla ad yuɣal ɛecra di meɣres d ass aɣennaw n tmedyazt, imi akken yecfa fell-as umezruy, ɣef winna iqerrɛen di tmurt-is ur d-yettawi awal ɣef tmedyazt at zik, deg wass yecban ass-n, akken i bɣan ad tt-arun s isefra d tmedyaztat at tura. I wid yebɣan ad ikin mazal tiwwura n tezizzelt tamezwarut llint, alamma d tagara n furar ɣer www.adrarnfad.com , imi timzizzelt n tagara ad d-tili deg ussan n tfaska, deg wedrar n Fad. Akken i s-yenna umedyaz deg wawal-is:
“Mi nɛedda i Weswel
Ad d-tban tubiret
Ɛɛeddaɣ ar Muḥya
Nesɛedda tallit
Ufiɣ-t-in yella
Amek akka ulac-it?
Ahya a Muḥ a gma
Terrez tecbaylit
Aqbayli n wass-a
Teɛreq-as teqbaylit!” ZEDEK Mulud
Tadukla n wedrar n fad tebda-d leqdic-is di 2003, ɣef tmedyazt, ɣef talaxt, ɣef tmerrit. Lebɣi n iɛeggalen-is meqqar. Ma yella ttawil ad kemmlen seg wecrured ɣer tikli. Awi-d kan ma yella wi lla,n s idis-nnsen.
Zira