Taɣiwant n Tezmalt, i d-yezgan ɣef wazal n 90 yikilumitren ɣef umalu n waɣir n Bgayet, rran tajmilt i umeɣras n tegrawla n Lezzayer 1954 ,Ɛabderraḥman Mira neɣ aɣilas n Summam isem i as-fkan imdukkal n tegrawla ɣef tirugza d tḥarci s wayes yettwassen. Annect-a yella-d mbaɛd mi iwḍen 55 n yiseggasen ɣef wasmi yeɣli deg wannar n yissaɣ ass n 06 unbir 1959. Leqdic-a yerza isaragen ɣef temlilt n umeɣras ama deg wayen iccuden ɣer uḥric n tsertit acku yella deg ukabar n ummusu n talekt i tlelliyin timagdayin (MTLD) akked wayen yerzan azal-ines deg tegrawla n wunbir 1954, rnu ɣer-s xedmen timzikent ideg d-sersen tugniwin n umeɣras d ittafttaren i d-yettmeslayen fell-as, akked temzizelt n ddabax n uḍar. Mca, annect-a yegla-d s temlilit n tarwa n tegrawla1954 ladɣa imjuhad i ixedmen yid-s akked twacult n umeɣras, Ɛlaḥsab iɛeggalen i d-iheggan leqdic-a wekkden-d dakken ayen akka xedmen ad yili d asmekti s wazal n umeɣras deg tegrawla 1954 iwakken ad ẓẓun isem-is i lebda deg tsuta i d-iteddun.
Bousbaine. S