Zzik, ɣef wakken d-eqqaṛen, yella yiwen n ubabat lak d mmi-s ttemḥellin-d deg wawal ɣef yemdukal-nsen. Mmi-s yeqqar-as i baba-s d akken aṭas n yemdukal i yesɛa, ma dagella yewḥel yiwen was, ma ur s-id-yeṭṭif yiwen afus, ad yaf wayeḍ. Ur yettfakka ara awal fell-asen. Winna ixdem-iyi aya. Wayeḍ yenna-yas ma tsutreḍ-iyi-d tiṭ-iw ak ttefkeɣ. Wayeḍ nniḍen yenna-yas mi iyi d-egreḍ tiɣṛi ayi-d-afeḍ ɣef yidis-ik ayfus, d waṭas nniḍen yal wa deg-sen d acu s yenna. Ababat ur tyeɛǧib ara lḥal. Yiwen was mi yebda mmi-s iskuffut awal yeqqaṛ mazal ɣef yemdukal-is, yenna-yas : Deg tegnitt n ddiq id d-ettbanen yerfiqen n tidett. Nek sɛiɣ kan yiwen. Ma d keč, ɣef leḥsab n wayen d-eqqaṛeḍ, gten. Yaṛeq leḥsab i tifin. Ihi, ass-a, ma tebɣiḍ, ayen yellan deg tasilt ad t-id-yessali uɣenja. Tura ad-nerr iman-nneɣ nebbi tamegṛeṭ. Rzu ɣer wemdakel deg ayeg tesɛiḍ laman, in-as i yellan i yellan, baba-k yenɣa yiwen n wergaz id d-iẓedmen s axxam. Tura atan deg tesga i tneḍleq. Akken ad yettwamḍel, mebla ma ifaq yiwen, ilaq-aɣ afus n tallelt. Ilemẓi yebbi abrid zdat-es qbala ɣer weṛfiq-nni s d-yesebbayen tifeswa. Yeḥka-yas-d tadyant akken s-d-yenna baba-s. Mi yekfa, winna s d-yemuzguten yebda yettettel wawal deg yimi-s. Yeqqel ar almi d-yeffeɣ ala nni. Ur yezmir ara acku yettagad tilufa yagi n tmegṛaḍ. Yeča tiyita ɣer daxel, aqcic yuɣal ɣer baba-s ad s-yini d acu yeḍṛan. Aneggaru-yagi ur yessewhem ara d acu s-d yenna mmi-s, yerra-t kan ɣef tebburt ad yerzu ɣer wayeḍ. Ula d tikkelt-agi ur d-yesli ara d acu yebɣa. Ababat yefka-yas i mmi-s tagnitt akken ad d-yezzi yak ɣef yemdukal-nni s wayes yettzuxxu. Ilemẓiibda ikečem-it ccek, maca mazal ur yeqḍiɛ ara layas. Tibbura n yemdukal-is yak iṣṭebṭeb fell-asen-t. Inna-yasen yak tiyita ten-yuɣen ar almi yeḥfa yiles-is deg uɛawed n lehduṛ. Si tama-nsen, yal yiwen d acu ara d-yaf d sebba akken ur yetteddu ara yid-es s axxam. Tiyita yeča-tt ɣer daxel teḥma, ula d yiwen ur t-id-yufi ɣer yidis-is akken ad t-iḥami deg tegnitt-agi n ddiq. Zzin-as-d ak s warur. Mi yekfa awi yerr, iceggeɛ-it baba-s ɣer wemdakel-is akken as-yeḍleb afus n lemɛawna. Akken cwiṭ yezzi-d yid-es. Mi d-iekcem s axxam, iseqsa anda yella winna nɣan akken ad tmeḍlen uqbel ad yali was. Ababat imuqqel mmi-s s wezmumeg yenna-yas : « Twalaḍ a mmi, akken qaṛen menyif takemmict n tzizwa wala aglaf n warẓaẓen. Sarameɣ d akken tagnitt-agi tella-yak-id d tamsirt ur tettettuḍ ara ». Mi yekfa awal lak d mmi-s, yezzi ɣer wemdakel-is akken ad s-yemmel anda yella winna nɣan. Amdakel itbeɛ qbala aḍad-nni s-d-yemlen anda tella tfekka n win yemmuten. Mi yebbeḍ ɣer taṛust yerfed aɣummu i wayen yufa yeddel, yufa d ikerri i ymezlen. Irfed-ed aqerru-s yezzi-d ɣer wemdakel-is iseqsa-t d acu ixeddem ikerri imezlen sufella n taṛust. Ababat s wezmumeg yerra-yas : d mmi ɣef ayeg ugadeɣ. Yezga iheddeṛ-iyi-d ɣef yemdukal-is. Ittxalaḍ aṭas mači d kra. Dɣa nniɣ-as ass-agi ad d-isali uɣenja ayen yella-n yezder deg lqaɛ n tasilt. Akka tettwaliḍ ala keč id d-yusan. Iqim-iyi-d kan ad k-iniɣ s tezmert-ik. Di tlata yid-sen zzin i ykerri sebbayen, setten ar almi ṛwan.
Yal yiwen amek yettwali tamsalt-agi. Llan wid yettamnen s tugett n yemdukal. Win sen-d-yeḍṣan yegla s wul-nsen. Llan daɣen wid yettarran tilas i wxaleḍ-nni ur nesɛi lmeɛna. I waṭas umu d-ḍeṛṛun-t temsal am tigi. Mi tweḥleḍ s ṛebɛa wid tesneḍ ad k-d-ezzin s warur.
T.Z.