Yella deg lḥala i ur nuqim akk, anida annar yexser, tiseddarin ulac. D ayen dɣa i yesfeqɛen ilemẓiyen. Taɣiwant n Tsexriwt (Taskriout) tɛewwel seg wayyuren i yezrin ad d-telhu yes-s s tallelt n tmehla n yilemẓiyen ed waddal (DJS) anida tesres tarmist i uqaɛɛed n lecɣal dinna. « Tura tiseddarin dayen nexdem-itent, aql-aɣ tura nettmuqul ttawil swayes ara nessufuɣ aman acku nesɛa aɣilif n lxiḍ n trisiti i yellan ddaw n tmurt, ilaq ad as-d-naf lferz ». Aya yenna-aɣ-t-id lmir n Tsexriwt mass Xufac Brahim. Akka ihi, seld mi yettwasbedd wallal i yemferǧen, mazal kan tifrat n waman, ladɣa n uɣebbar (ageffir), ansi i ara teffɣen s tɣara i iwulmen. « Walaɣ-t tura s wudem-is amaynut, yewwi-d iman-is. Ẓriɣ ttilint-d dinna temliliyin s wazal-nsen. Ad ferḥen yimyuraren n temnaḍt ». Ay d-yenna yiwen n yilemẓi. D tidet, aya ad yessecreh inaddalen merra n tɣiwant n Tsexriwt ed tid i as-d-yezzin, skud rran-d i ɣur-sen awellih wid i terza taluft. D ayen i yessefk ad d-yili, akken ad nessuter agerrez n yigemmaḍ deg yilemẓi yessulef tazwara ad as-d-neg ttawil, ad as-nefres iberdan i yessawaḍen ɣer usmures (réussite). Iqeddicen ur rennun aɛeṭṭel xilla bac ad fakken, ḥeḍru-d d aheggi-ines.
Mhenni Xalifi