Tudert n tameṭṭut taqbaylit tbeddel ɣef zzik. Di teswiɛt-nni, tdehhu-d kan s lxedma n wexxam am uẓeṭṭa n ibernyas d iceṭṭiḍen, taxeggaṭ n itararen, asewwi, acraw lak d tin n lexla, ladɣa iqwiṛen, alqaḍ n uzemmur d wayen nniḍen. Tura, tugett n tlawin ɣṛan-t ayen sen-t-yeksen tazaglutt-nni yuɣalen fell-asen-t ɣef teɣzi n leqṛun. Ass-s ad tt-tafeḍ d tamejjayt, d taselmadt, d tabugaṭutt, d tajenyuṛt, d taneɣmast,…Ula d tid ur nṣaweḍ ara ad kecmen-t ɣer tesdawit, ṣawḍen-t ad tebɛen-t abrid n lḥirfat yemxallafen am txeggaṭ, asebbi, amcaḍ, ma nebder-ed kra ger wiyyaḍ. Tameṭṭut akka tura tesɛa izerfan ɣer uxeddim am nettat am wergaz. Tugett deg-sen-t ṭfen-t imekwan-nsen-t deg yeḥricen yemxallafen n lxedma. Ayagi d ayen d-yeglan s uwenneɛ n liḥala-s, ladɣa tanefsit-is. Imejjayen n tnefsit lak d isenmatiyen gren-d tamawt i wemgired yella-n ger tmeṭṭut yedren deg tmetti n zzik lak d tin n tura. Tura tettkel ɣef yiman-is, tettḥulfu i tlelli-ines deg wawal, llebsa, s wazal-is deg twacult, deg uxeddim, neɣ deg tmetti sumata. Tameṭṭut tura tezmer ad d-efk aṛṛay-is, tamuɣli-s ɣef temsal yemxallafen. Tezmer daɣen ad d-meslay ɣef iḥulfuyen-is, ladɣa ayen yaɛnan tayri, melba tugdi neɣ leḥya. Zwaǧ-is, ma nebder-ed amedya-yagi, yettili-d lak d win tessen, win yebɣa wul-is, mači am zzik, win d-yusan yeɛǧeb-asen i ymwalan-is yewwi-tt.
Fatiha K.