Azekka d aram (ttlata), 30 deg wayyur n ctember, i ara yili umsizwer adigan (local) n yiqennucen deg tɣiwant n Ait-Smaɛel i d-yezgan s wazal n 60 n yikilumitren seg waɣir n Bgayet. Deffir mi yettwanɣel (yettwabṭel) umsiẓwer-a ilindi ɣef sebba n uheggi i ur nelli fessus imir-nni, aseggas-a atan ihi d tuɣalin-is. Aya yessecreh xilla kra n Tesmaɛliyin i d-ilehhun ed tgemmi-a tangawant (patrimoine matériel), acku ilindi sḥassfent rnu feqɛent nezzeh mi yettwabṭel ttiɛad am wa, i d-yettilin, ad t-id-nesmekti, i walmend ed yiseɣ-nsent am tejmilt. Imi lemmer mačči d nutenti, lemmer mačči d tulawin tizwawin s umata, tili ass-a ur ntessen agerruj i d-ssidrent ar tsuta-a. Tili ur nẓerr ara yakk d acu mu qqaren: timeḥlebt, afan, neɣ tacmuxt. Ilindi, kra n lxalat ed temɣarin n Ayt-Smaɛel llant grant uɣud ilmend i umsiẓwer i ɣilent ad d-yili, maca aseggas-a, ilemẓiyen i yeṭṭfen tidukkla taggara-a kan, ɛewwlen ad yili usihar-a, rnu ad gen am akken ara yeqlaɛ s tidet warmud n tidukkla. Ɣef waya yenna-d uselway ilemẓi amaynut n Tidukkla Tadelsant Adrar n Fad mass Bakkuc, dakken kullec ihegga s wallalen merra iwakken ad temmag tmeɣra-a n yidles deg Ayt Smaɛel, azekka 30 deg wayyur n ctember. I uneɣmis, tulawin i ara yettekkin ad ceyyɛent ɣer tidukkla aqennuc i asent-yehwan (d taɣezzalt neɣ d tabuqalt neɣ…) i yemuggen s tɣara tansayant, akked rrqem n zik daɣen anya, syin ɣer-s, ass n umsiẓwer tella yiwet n terbaɛt n yinezzurfa (jurys) gar-asen amedyaz Brahimi Lxiyyer i d-yessufɣen yakan adlis i izewwel « yal azamul yesɛa azal ». Kraḍ n tid i d-yufraren ad awint arrazen, ma d tid nniḍen ad asent-yili kra n usebɣes. « Lliɣ ad tekkiɣ ilindi maca ur temmug ula. Aseggas-a ad iliɣ din ma yebɣa Rebbi. Ssarameɣ s wayen qeddcen yilemẓiyen ad yeǧ ula d tisliyin temeẓẓyanin ad bennunt ma kkant kkant, axaṭer nutenti ǧǧan lɛada-a ». Ay d-tenna yiwet n Tesmaɛlit.
Mhenni Xalifi