Sin yiseggasen –agi kan segmi i d-tlul tiddukkla n Soummam Aqbou, maca leqdic-is, yufrar-d s waṭas deg unnar. Yal taggara n ddurt, iɛeggalen n tiddukkla-a, ttheggin-d tirza ɣer kra n taddart. Teddun yid-sen imejjayen n leḥlalakat yemxalafen, am lehlak n ssker, wid n lehlak n wul akked d tmejjayin n lehlak n yidmaren ɣer tlawin. Ttawin yid-sen ddwawi d tɣawsiwin seqdacen. Xeddmen ayen iwumi qqaren ‘’Abeggen n lehlak di lawan’’ iwumi qqaren s tefransist” le dépistage “ akken ad yeɛlem umuḍin s lehlak-is ɣef zik lḥal uqbel ad yessiɣ deg-s, ladɣa imeqqranen yeddan di laɛmer. Nnig n 28 n turziwin ixedmen. Gar tudrin uɣur rzan, ad naf Sedduq wada, At Jemhur , Iɣil Ali , Tazmalt , At Mlikec, Icelladen , Iɣram, Truna akked d tudrin n lɛerc At Ɛidel s umata…atg. Azal n 4ooo n yimuḍan i duwan, nnig 180 n tfaṭurin n dwayat i fkan i wid ur nezmiren ara. Ɣer waya, yettili-d daɣen ibeddi ɣer tama n kra twaculin yenxessen ur sɛin ara tamezduɣt, ttɛawanen-ten di lebni…atg. Ttawin imejjayen n tnefsit ɣer yiɣerbazen, ttaken-d isaragen I lfayda n yinelmaden yettheggin iman-nsen ad sɛeddin ikayaden n BAC d BEM. Xeddmen timliliyin ideg i d-ttaɛraden imejjayen i wakken ad d-sfaḥmen i yimezdaɣ timental n waṭas n waṭṭanen n lqern, akka am lehlak n yidmaren , ssker , sida…atg . ”Ayen akka i nxeddem i yimezdaɣ, d lwajeb fell-aɣ, tajmilt ad tuɣal i yimawlan n lxir n temnaḍṭ n Soummam i d-yettaran i tiɣri-nneɣ yal tikelt. Ad ten-nesnemmer, gar-asen imḍebber n luzin n uyefki “Soummam” Lewnis Hamitouche i d-yettaken afus n lemɛawna, nebla ma ttuɣ imejjayen, Mass Nebbad, amejjay n wallen, Mass Sbayɛi amejjay n wul, Massa Fezwa tamejjayt n tuɣmas , akked d Mass Zakaria, Boubechir, Sehnun akked d Mass Melwi d wiyaḍ-nniḍen i iteddun yid-nneɣ yal tikelt’’ i d-yenna Mass Djernin Hamid s yisem-is d aselway n tidukla. Akka imi ara yili lebɣi, kulec ad yezmer ad d-yili, ad teqqim tiddukkla ” Soummam Akbou”, d amedya i tiyaḍ-nniḍen ma bɣant ad ddunt deg ubrid n lxir, lmeɛna d yibeddi ɣer tama n tmetti .
Brahim benhamouche