Ma ur ibekker ara yiwen n tsaɛet neɣ snat ɣer lbusṭa n Ubqu, ur yessawaḍ ara ad d-yeqḍu kra n tɣawsa yeḥwaǧ dinna imi aṭas n lɣaci i tt-id-iqesden, yal ass, seg tudrin i d-yezzin i tɣiwant. Deg laɛwacer neɣ di lawan n lexlas n yixeddamen, tuget n yimezdaɣ, ttruḥun ɣer tɣiwant n Yiɣrem d Uzellagen i wakken ad d-jebden idrimen-nsen .‘’Dlewhayem, snat n lbusta i nnig 150 000 d amezdaɣ’’, i aɣ-d-yenna yiwen urgaz. Simmal, ad yettzad leɛdad n yimezdaɣ, simmal, ad ttnernin wuguren di lbusta n Uqbu ɣef yixedamen-is imi nutni, si tama-nsen, ur zmiren ara ad qablen annect-nni n lɣaci i d –yettasen yal ass. Ḍeyqent mliḥ, rnu leɛdad ixedamen-nsent drus. kif kif daɣen ɣef wid i tt-id-iqesden: ur sawaḍen ara ad qḍun ayen qesden di lawan seg uraju d umdegger. Ugur ameqqran, ttnalent yimɣaren d yimeɛdar . ’’ur zriɣ ara amek ara nettmeslay ɣef Uqbu ad yuɣal d lwilaya, nekni mazal ɣer ass-a di lbusṭa-nni akken i d –teǧǧa fransa. tella yiwet d tameẓyant, maca mi testeqsaḍ ad ak-inin ulac la connexion ‘’ i aɣ-d-yenna yiwen yilemẓi i nesteqsa .
Brahim Benhamouche