Ass-nni n lexmis 02 deg waggur n yebrir 2017, lewhi n 12h00 uzal, yerɣa yiwen uxxam deg taddart n Tahanouts, yetabaɛen ɣer tɣiwant n Ait Aissa Mimoun. Ssebba n tmerɣiwt-is, d agzam igezmen yixeddamen n tkebbanit n lgaz d trisiti (Sonalgaz) tasebḥit n wass, syin akkin mi yezgen wass rran-tt-id, dɣa tegla-d s twaɣit-agi n tmerɣiwt s trisiti. Axxam-agi n twacult K. A yellan akkin i taddart, yuɣ lḥal tella yiwet n tmeṭtut deg-s, i isuɣen syin uzzlen Wat taddart ssufɣen-d tibutayin n lgaz, rnan ssufɣen-tt-id ula d nettat imi tettwaxnaq seg dduxxan n yiceṭiḍen-nni yerɣan. Usan-d yiɣalen n usellek wwin-tt ɣer sbiṭar n Med Nadir n Tizi Uzzu, maca ur tɛeṭṭel ara tuɣal-d s axxam. Ad d-nesmekti belli, d tagi i tawaɣit tis snat n tmerɣiwt n sin yixxamen deg wakal n tɣiwant n Ait Aissa Mimoun, gar taggara n useggas yezrin d tazwara n useggas-agi ideg nella. Imi tamezwarut tella-d deg taggara n waggur duǧember iɛeddan, menbeɛd mi yerɣa yiwen n uxxam s lgaz deg taddart n Ait Brahem, i d-yeglan s lmut n yiwet n tmeṭṭut, d truẓi n urgaz-is d mmi-s. Tura terna-d tis snat-agi, acu kan ta ulac s wacu i d-tegla di lerwaḥ.
A. A